ភ្នំពេញ៖ ឯកឧត្តម ខៀវ កាញ្ញារីទ្ធ រដ្ឋមន្រ្តីក្រសួងព័ត៌មាន កាលពីថ្ងៃទី២៨ ខែមេសា ឆ្នាំ២០២៣ បានអញ្ជើញជាអធិបតីភាពក្នុងពិធីសម្ពោធបោះពុម្ព និងផ្សព្វផ្សាយសៀវភៅដែលមានឈ្មោះថា "ហ៊ុន សែន កម្ពុជា" ។

លោក ទុំប៉ែន វីរៈវិទូ ប្រធានក្រុមការងារស្រាវជ្រាវរបាយការណ៍និពន្ធសៀវភៅសម្តេចទាំងទ្វេ បាន​ឲ្យ​ដឹង​ថា ក្រុមការងាររបស់លោកបានខិតខំនិពន្ធ ចងក្រងឡើងដោយមាន ការអនុញ្ញាត​ដ៏​ខ្ពង់​ខ្ពស់​​ពី សម្តេចតេជោ ហ៊ុន សែន នាយករដ្ឋមន្រ្តី ដើម្បីបោះពុម្ពផ្សព្វផ្សាយដល់គ្រប់ស្ថាប័ន បាន​អាន​ឈ្វេង​យល់ពីការដឹកនាំប្រកបដោយគតិបណ្ឌិតរបស់សម្តេចតជោ ដែលបានស្វែង​រក​សន្តិភាព​ពេញ​លេញ​ជូនប្រជាជនកម្ពុជា និងបានកសាងប្រទេស​កម្ពុជា​ពី​បាតដៃ​ទទេ​រហូត​ដល់​មាន​ការ​អភិវឌ្ឍលើគ្រប់វិស័យ និងមានកេរ្តិ៍ឈ្មោះល្បីល្បាញលើឆាកអន្តរជាតិ។

លោក ទុំប៉ែន វីរៈវិទូ បញ្ជាក់ថា សៀវភៅ “ហ៊ុន សែន កម្ពុជា” នេះបាននិពន្ធចងក្រង បោះពុម្ព និង​ផ្សព្វផ្សាយដល់គ្រប់ស្ថាប័នចំនួន ០១លើក រួចមកហើយ និងនិពន្ធចងក្រងលើកទី០២នេះ រហូត​ដល់​ជាង១០០០ទំព័រ ដោយឆ្លុះ​បញ្ចាំង​ពី​នយោបាយ​បង្រួប​បង្រួម​ផ្សះផ្សា​អភិវឌ្ឍជាតិ​ពី​គំនរ​បែក​បាក់​ដោយសារសង្គ្រាម ហើយអាចនិយាយបានថា ជាសៀវភៅប្រវត្តិសាស្ត្រ​មួយ​ដ៏​មាន​សារៈសំខាន់​សម្រាប់​ក្មេង​ជំនាន់​ក្រោយ​បាន​សិក្សា​ឈ្វេង​យល់​ពី​ការ​ដឹកនាំ​ប្រទេស​កម្ពុជា​របស់​សម្តេច​តេជោ ហ៊ុន សែន ។

លោក ទុំប៉ែន វីរៈវិទូ បន្ថែមថា សម្តេចតេជោ ហ៊ុន សែន ជាមគ្គទេស៍ឯកនយោបាយ ឈ្នះ ឈ្នះ ក៏​ដូច​ជា​បិតាកសាង សន្តិភាព ជានិមិត្តរូបនៃសន្តិភាពនិងការអភិវឌ្ឍ ដែលជា​សសរ​ទ្រូង​ដ៏​រឹងមាំ​របស់​គណបក្សប្រជាជនកម្ពុជា និងជាក្តីសង្ឃឹមរបស់ប្រជាជនកម្ពុជា៕