ស្នងការនគរបាលតំបន់ San Jacinto លោក Greg Capers បាននិយាយកាលពីថ្ងៃសៅរ៍ថា ខ្មាន់កាំភ្លើងម្នាក់បានបាញ់សម្លាប់មនុស្ស៥នាក់ រួមទាំងកុមារអាយុ៨ឆ្នាំម្នាក់ បន្ទាប់ពីក្រុមអ្នកជិតខាងបានសុំឲ្យបុរសម្នាក់ឈប់បាញ់ដោយប្រើអាវុធម៉ាក AR-15- នៅក្នុងទីធ្លាមុខផ្ទះរបស់គេ ក្នុងទីក្រុង Cleveland រដ្ឋ Texas សហរដ្ឋអាមេរិក ។

លោក Capersបានប្រាប់សារព័ត៌មាន Reutersថា នគរបាលនៅតែកំពុងតាមប្រមាញ់ជនសង្ស័យ ដែលបានប្រើកាំភ្លើងវែង ម៉ាក AR-15 ក្នុងការបាញ់ប្រហារកាលពីល្ងាចថ្ងៃសុក្រ។

លោក Capers បាននិយាយថា ក្រុមអាជ្ញាធរ បានចោទប្រកាប់លោក Francisco Oropeza វ័យ៣៨ ឆ្នាំ ជនជាតិម៉ិកស៊ិក ចំនួន៥ ករណីពាក់ព័ន្ធអំពើឃាតកម្ម និងកំពុងតាមចាប់ខ្លួនកាលពីព្រឹកថ្ងៃសៅរ៍ ។

ស្នងការតំបន់រូបនេះ បាននិយាយថា ជនសង្ស័យកំពុងរត់គេចខ្លួននៅក្នុងតំបន់ឧទ្យានជាតិ Sam Houston National Forest នៅក្នុងស្រុក San Jacinto ។ យើងកំពុងតាមចាប់ខ្លួនរូបគេ ដោយមានសុនខស្រង់ក្លិន និងកងកម្លាំងជិះសេះ ព្រមទាំងយានដ្រូន ។

លោកថា ក្រុមមន្ត្រីមកពីការិយាល័យរបស់ស្នងការនគរបាល Capers បានទទួលទូរស័ព្ទរៀបរាប់ ពីការបាញ់ប្រហារ ពីទីក្រុង Cleveland នៅម៉ោង ប្រហែល១១ និង៣១នាទី យប់ ម៉ោងនៅសហរដ្ឋអាមេរិក នៅពេលពួកគេបានទៅដល់កន្លែងកើតហេតុ និងបានឃើញជនរងគ្រោះមួយចំនួន ដែលត្រូវបានបាញ់។

លោក Capers បាននិយាយថា មានមនុស្សសរុប១០នាក់នៅក្នុងផ្ទះនោះ នៅពេលខ្មាន់កាំភ្លើងបាន សម្រុកចូល និងចាប់ផ្ដើមបាញ់រះ មនុស្ស៥នាក់ក្នុងចំណោមពួកគេបានរួចផុតពីការស្លាប់៕