ស្វាយរៀង ៖ ថ្ងៃទី៣០ ខែមេសា ឆ្នាំ២០២៣ ក្នុងនាម សម្តេចកិត្តិសង្គហបណ្ឌិត ម៉ែន សំអន អនុប្រធាន​គណបក្សប្រជាជនកម្ពុជា និងជាប្រធានក្រុមការងារ​គណបក្ស​ចុះមូលដ្ឋាន​ខេត្ត​ស្វាយរៀង ឯកឧត្ដម លី ធុជ សមាជិកគណៈកម្មាធិការកណ្តាល និងជាប្រធានក្រុមការងារ​គណបក្ស​ចុះមូលដ្ឋានក្រុងបាវិត ខេត្តស្វាយរៀង បានអញ្ជើញប្រកាសបញ្ចូល​សមាជិកថ្មីរបស់គណបក្ស​ប្រជាជនកម្ពុជាចំនួន ៣៤៥ មកពីសង្កាត់បាទី និងសង្កាត់ប្រាសាទ ក្រុងបាវិត ខេត្តស្វាយរៀង។

ឯកឧត្ដម លី ធុជ បានស្វាគមន៍យ៉ាងកក់ក្តៅ និងអបអរសាទរចំពោះការ​សម្រេច​ចិត្តចូលរួមរស់​ជាមួយមហាគ្រួសារ​នៃគណបក្សប្រជាជនកម្ពុជា ក្រោមការដឹកនាំដ៏ខ្ពង់ខ្ពស់របស់ សម្តេច​អគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ហើយឯកឧត្ដម លី ធុជ បានចាត់ទុកការរួមរស់ជា​មួយ​គណបក្ស​របស់បងប្អូន​ប្រជាពលរដ្ឋ គឹជាការសម្រេចចិត្ត​ដ៏ត្រឹម​ត្រូវបំផុត ដើម្បីចូលរួមបន្តថែរក្សាសុខសន្តិភាព និងការអភិវឌ្ឍប្រទេសជាតិ ក៏ដូចជាចូលរួម​ដល់ការអភិវឌ្ឍនៅតាមមូលដ្ឋានឲ្យកាន់តែប្រសើរឡើង។ ឯកឧត្ដម​បន្តទៀតថា មានតែ​គណបក្ស​ប្រជាជនកម្ពុជា មួយប៉ុណ្ណោះ ដែលតែងតែគិតគូរ និងផ្តល់នូវផល​ប្រយោជន៍​យ៉ាងច្រើន​សន្ធឹកសន្ធាប់ សម្រាប់ការ​កសាងជីវភាពរស់នៅប្រចាំថ្ងៃរបស់បងប្អូនប្រជាពលរដ្ឋ។

ក្នុងពិធីនោះ ឯកឧត្ដម​ប្រធានក្រុមគណបក្សចុះមូលដ្ឋានក្រុងបាវិត បានណែនាំឲ្យសមាជិក សមាជិកាគណបក្ស​ដែលទើបបញ្ចូលថ្មីទាំងអស់ ត្រូវបន្តចងចាំនូវគុណតម្លៃ និងការដឹកនាំ​ជាប្រវត្តិសាស្រ្តរបស់គណបក្សប្រជាជនកម្ពុជា ចំនួន ០៣ចំណុច រួមមាន៖

១/. ថ្ងៃរំដោះ ៧មករា ៖ ថ្ងៃ៧មករា គឺជាថ្ងៃប្រវត្តិសាស្រ្ត និងជាសមិទ្ធផលមិនអាចកាត់ថ្លៃបានរបស់គណបក្សប្រជាជនកម្ពុជា ដែលបានរំដោះប្រទេសជាតិ និង​ប្រជាជនកម្ពុជា ចេញពីរបបប្រល័យពូជសាសន៍ ប៉ុល ពត ព្រមទាំងបានផ្តល់នូវកំណើតទី២ ជូនដល់​ប្រជាជនកម្ពុជាទាំងអស់។

២/. នយោបាយ ឈ្នះ ឈ្នះ ៖ ទោះបីប្រទេសកម្ពុជា ត្រូវបានរំដោះចេញពីរបបប្រល័យពូជសាសន៍ ប៉ុន្តែប្រទេសជាតិនៅតែបន្តបែកបាក់គ្នា និងបែងចែកតំបន់គ្នាគ្រប់គ្រង។ ក្រោមនយោយបាយ ឈ្នះ ឈ្នះ របស់សម្តេចតេជោ ជាបិតាសន្តិភាព កម្ពុជាបានក្លាយជាប្រទេសតែមួយ ទទួលបានសុខសន្តិភាព និងស្ថិរភាពនយោបាយពេញលេញពាសពេញផ្ទៃប្រទេស។

៣/. សន្តិភាព ស្ថិរភាព និងការអភិវឌ្ឍ ៖ រាជរដ្ឋាភិបាលកម្ពុជា ក្រោមការដឹកនាំរបស់​គណបក្សប្រជាជន​កម្ពុជា បានខិតខំប្រឹងប្រែងស្តារ និងអភិវឌ្ឍន៍ប្រទេសជាតិ​ឲ្យមានការ​រីកចំរើនលើគ្រប់វិស័យដូចសព្វថ្ងៃ ព្រមទាំង​បានកសាងនូវសមិទ្ធផលជាប្រវត្តិសាស្រ្តយ៉ាងច្រើន និងលើកកម្ពស់កម្ពុជា​ឲ្យស្មើមុខស្មើមាត់​ជាមួយបណ្តា​ប្រទេសនានាជុំវិញពិភពលោក។

ក្នុងឱកាសនោះ ឯកឧត្ដម​ លី ធុជ បានពាំនាំសេចក្តីនឹករលឹក និងសាកសួរសុខទុក្ខពីសម្តេចតេជោ និងសម្តេចកិត្តិព្រឹទ្ធបណ្ឌិត ក៏ដូចជាសម្តេចកិត្តិសង្គហបណ្ឌិត ជូនចំពោះសមាជិក សមាជិកា​គណបក្ស​ក្រុងបាវិតទាំងអស់ ព្រមទាំងជម្រុញឲ្យសមាជិក សមាជិកាទាំងអស់ បន្តជួយផ្សព្វផ្សាយ​អំពីសមិទ្ធផល​នានា​របស់គណបក្សប្រជាជនកម្ពុជា និងណែនាំអោយក្រុមគ្រួសារ សាច់ញាតិ និងមិត្តភ័ក្តិទាំង​អស់ទៅបោះឆ្នោត​ជ្រើសរើសតំណាងរាស្រ្តអាណត្តិទី៧ ឆ្នាំ ២០២៣ និងបោះឆ្នោតជូនគណបក្សប្រជាជនកម្ពុជា៕