ភ្នំពេញ ៖ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន សមាជិកគណៈអចិន្រ្តៃយ៍ និងជាអនុប្រធាន​គណៈចលនា​មហាជននៃគណៈកម្មាធិការកណ្ដាលគណបក្សប្រជាជនកម្ពុជា បានធ្វើបទបង្ហាញ​លើប្រធានបទ៖ « បច្ចុប្បន្នភាព​ស្ថានភាពសេដ្ឋកិច្ច និងសង្គមកម្ពុជា» ក្នុងពិធីជួបជុំរចនាសម្ព័ន្ធគណៈចលនាមហាជនទូទាំងប្រទេស នៅវិមាន ៧មករា។

​ក្នុងនាមជាថ្នាក់ដឹកនាំមួយរូបនៃ គណបក្សប្រជាជនកម្ពុជា ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន សមាជិកគណៈអចិន្រ្តៃយ៍ និងជាអនុប្រធានគណៈចលនាមហាជន​នៃគណៈកម្មាធិការ​កណ្ដាលគណបក្ស​ប្រជាជនកម្ពុជាបានគូសបញ្ជាក់ពីបណ្តាសមិទ្ធផលធំៗ​របស់​រាជរដ្ឋាភិបាល ក្រោមការដឹកនាំដ៏ត្រឹមត្រូវ និងប្រកបដោយភាពចាស់ទុំរបស់គណបក្សប្រជាជនកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំ។ សមិទ្ធផលទាំងនោះរួមមាន៖ ការធ្វើឱ្យប្រសើរឡើងនៃស្ថានភាពម៉ាក្រូសេដ្ឋកិច្ច ពាណិជ្ជកម្ម និងវិនិយោគ ជាពិសេសការជំរុញការងើបឡើងវិញ នៃសេដ្ឋកិច្ចក្រោយវិបត្តិកូវីដ-១៩ ។ ទន្ទឹមនេះ ឯកឧត្តមក៏បាន​បញ្ជាក់ពីការសម្រេចបានរបស់រាជរដ្ឋាភិបាលក្នុងការអនុវត្តគោលនយោបាយគាំពារសង្គម និងបេឡាជាតិសន្តិសុខ​សង្គម ដែលបានផ្តល់អត្ថប្រយោជន៍ដល់កម្មករ និយោជិតដែលជា​កម្លាំងស្នូលនៃ​ចលករសេដ្ឋកិច្ចជាតិ។

សូមជម្រាបថា ក្នុងពិធីជួបជុំនាឱកាសនេះ នឹងមានបទបង្ហាញចំនួន ០៣ របស់ថ្នាក់ដឹកនាំជាវាគ្មិន ដែលនឹង​ផ្តល់ជាពិសោធ និងចំណេះដឹងថ្មីៗបន្ថែមទៅលើបច្ចុប្បន្នភាពស្ថានភាព នយោបាយ សេដ្ឋកិច្ច និងសង្គមកម្ពុជា, បទពិសោធក្នុងការតាមដាន វាយតម្លៃ និងគ្រប់គ្រងសមរភូមិសតិអារម្មណ៍ និងការងារមហាជនសំខាន់ៗ ឆ្ពោះទៅកាន់ការបោះឆ្នោតឆ្នាំ២០២៣៕ ដោយ ៖ គីម ហុក