ភ្នំពេញ ៖ ឯកឧត្តម ឱម យ៉ិនទៀង ក្នុងនាមជាថ្នាក់ដឹកនាំគណបក្សប្រជាជនកម្ពុជា មួយរូបក្នុងឱកាស​ពិធីជួបជុំ​រចនាសម្ព័ន្ធ​គណៈចលនាមហាជនទូទាំងប្រទេសនាព្រឹកថ្ងៃទី៣០ ខែមេសា ឆ្នាំ២០២៣ ​ បានធ្វើបទបង្ហាញ​ចែករំលែក«បទពិសោធន៍ក្នុងការតាមដាន វាយតម្លៃ និងគ្រប់គ្រងសមរភូមិសតិអារម្មណ៍» ជូនដល់​រចនាសម្ព័ន្ធ​គណៈចលនាមហាជន។

ឯកឧត្តម បានគូសបញ្ជាក់ពីភាពចាំបាច់ និងសារៈសំខាន់នៃការងារគ្រប់គ្រងបញ្ហាសតិអារម្មណ៍សម្រាប់​ការងារអប់រំនយោបាយ និងសកម្មភាពរបស់បក្ស ជាពិសេសក្នុងការវាយតម្លៃវិភាគ បូកសរុបនូវសកម្មភាព និងសភាពការណ៍ដែលកើតមានក្នុងមូលដ្ឋានជាប្រចាំ។

ឯកឧត្តមបានលើកឡើងថា ការគ្រប់គ្រងសមរភូមិសតិអារម្មណ៍ មិនមែនត្រឹមជាការក្តាប់ស្ថានសភាពការណ៍ប៉ុណ្ណោះទេ តែក៏ជាការជំរុញឱ្យមានការយល់ដឹងត្រឹមត្រូវ និងវិជ្ជមានអំពីគណបក្ស កម្មវិធីនយោបាយ សភាពការណ៍ជាតិ-អន្តរជាតិ ព្រមទាំងអំពីទង្វើដ៏ល្អប្រពៃរបស់មន្ត្រីបក្សក្នុងមូលដ្ឋាននីមួយៗ។

ឯកឧត្តមបានលើកទឹកចិត្តឱ្យ មន្រ្តី សមាជិក សមាជិកា និងសកម្មជនគណបក្ស ត្រូវរៀនសូត្រតាម​គម្រូវីរភាពរបស់ថ្នាក់​ដឹក​នាំកំពូលរបស់គណបក្សលើការងារសតិអារម្មណ៍ និងបន្តខិតខំពង្រឹងសមត្ថភាពជា​ប្រចាំដើម្បី​អនុវត្តការងារ​មហាជនឱ្យកាន់តែមានប្រសិទ្ធភាព និងទទួលបានលទ្ធផលជាផ្លែផ្កាបន្ថែម៕ ដោយ ៖ គីម ហុក