ឯកឧត្តម ហ៊ុន ម៉ានី អគ្គលេខាធិការនៃអគ្គលេខាធិការដ្ឋាននៃគណៈចលនាមហាជនគណបក្សប្រជាជនកម្ពុជា បានលើកឡើងក្នុងការធ្វើបទបង្ហាញលើប្រធានបទ«ការងារចលនាមហាជនសំខាន់ៗឆ្ពោះទៅកាន់ការបោះឆ្នោតឆ្នាំ២០២៣» ក្នុងពិធីជួបជុំរចនាសម្ព័ន្ធគណៈចលនាមហាជនទូទាំងប្រទេស ថា៖ «បើបក្សមិនឈ្នះឆ្នោតទេ សមាជិក សមាជិកាបក្សក៏មិនមានឱកាសបានបន្តដឹកនាំប្រទេស អោយបានកាន់តែរីកចម្រើនដែរ»។

ទន្ទឹមនឹងការលើកឡើងខាងលើ ឯកឧត្តមបានបញ្ជាក់ថា ការឈ្នះឆ្នោត គឺមិនមែនសំដៅលើ​តែត្រឹមថ្ងៃទី២៣ កក្កដា ឆ្នាំ២០២៣ នោះទេ តែត្រូវឈ្នះជារៀងរហូត ​និងគ្រប់ពេលវេលា។

ឯកឧត្តម បន្តថា សកម្មជនគណបក្សទាំងអស់ ​ត្រូវអនុវត្តនយោបាយឲ្យជាក់លាក់ មាន​អាកប្បកិរិយា​ល្អ ​ពាក្យសម្តីទន់ភ្លន់ច្បាស់លាស់ ​បន្តធ្វើអំពើល្អជាប្រចាំ ដើម្បីឲ្យប្រជាជនមាន​ទំនុកចិត្តថា គណបក្សប្រជាជន ពិតជានៅជាមួយប្រជាជន។ ការកាន់អំណាច គឺដើម្បីប្រជាជន។

សូមជម្រាបជូនផងដែរថា រយៈពេលពេញមួយថ្ងៃនេះ គណៈចលនាមហាជននៃគណៈកម្មាធិការកណ្តាល​គណបក្សប្រជាជនកម្ពុជា បានរៀបចំពិធីជួបជុំ​រចនា​សម្ព័ន្ធ​​គណៈចលនាមហាជនទូទាំងប្រទេស ​ក្នុងគោលដៅដើម្បីធ្វើបច្ចុប្បន្នភាព និងចែករំលែក​ដល់រចនាសម្ព័ន្ធរបស់គណៈចលនាមហាជនទូទាំងប្រទេស នូវស្ថានភាពនយោបាយ សេដ្ឋកិច្ច សង្គម និងបទពិសោធន៍ក្នុងការតាមដាន វាយតម្លៃ និងគ្រប់គ្រងសមរភូមិសតិអារម្មណ៍ ក៏ដូចជា​កិច្ចការមហាជនសំខាន់ៗ ដែលត្រូវយកចិត្តទុកដាក់សម្រាប់ដំណើរឆ្ពោះទៅកាន់ការបោះឆ្នោត​ជ្រើសតាំងតំណាងរាស្រ្ដ នីតិកាលទី៧ នាថ្ងៃទី២៣ ខែកក្កដា ឆ្នាំ២០២៣ ខាងមុខនេះ។