ភ្នំពេញ៖បន្ទាប់ពីការចុះអនុស្សារណៈយោគយល់ រវាងសាកលវិទ្យាល័យខេមតិច ជាមួយសហគ្រិនខ្មែរ កាលពីដើម​ខែមេសាកន្លងទៅនេះ សាកលវិទ្យាល័យខេមតិច បានរៀបចំបទបង្ហាញពីការប្រកួតប្រជែងបច្ចេកវិទ្យានវានុវត្តន៍ (Innovative Tech Challenge: Building the Innovative future today) ដែលមាននិស្សិតចូលរួមសរុប​ប្រមាណ១២០នាក់ មកពីសាកលវិទ្យាល័យនានា នារសៀលថ្ងៃទី២៨ ខែមេសា ឆ្នាំ២០២៣ ក្រោមការឧបត្ថម្ភ​ផ្នែកហិរញ្ញវត្ថុ ពីសហគ្រិនខ្មែរ និង UNESCAP។

កម្មវិធីនេះ មានគោលបំណងបង្ហាញពីប្រធានបទសម្រាប់ធ្វើការស្រាវជ្រាវ នវានុវត្តន៍ និងការបណ្តុះគំនិត​សហគ្រិន​ភាព​ដល់សិស្សនិស្សិត ដោយសង្ឃឹមយ៉ាងមុតមាំថា និសិ្សតនឹងបង្កើតគំនិតអាជីវកម្មថ្មីនាពេលអនាគត។ កម្មវិធីនេះដែរ គឺមានការបណ្តុះបណ្តាលធុរកិច្ចដែលមានរយៈពេល ៤ខែ សម្រាប់ការរៀនអភិវឌ្ឍ​គំនិតថ្មីៗទាក់ទង​និងបច្ចេកវិទ្យា ផែនការអាជីវកម្ម និងពង្រឹងជំនាញសហគ្រិនភាពរហូតដល់ការប្រកួតប្រជែងជ័យលាភីផងដែរ។

តាមសាកលវិទ្យាល័យខេមតិច បានបញ្ជាក់ថា គោលបំណងសំខាន់នៃការប្រកួតប្រជែងបច្ចេកវិទ្យានវានុវត្តន៍នេះ មានដូចជា៖ ផ្តល់ជាថវិកាសម្រាប់ការគាំទ្រដល់ចាប់ផ្តើមបង្កើតគំនិតធុរកិច្ចថ្មី និងជំរុញឱ្យគំនិតធុរកិច្ចថ្មីនេះ​ក្លាយ​ជាក្រុមហ៊ុន/អាជីវកម្មផ្នែកបច្ចេកវិទ្យានាពេលអនាគត, ផ្តល់វគ្គបណ្តុះបណ្តាលធុរកិច្ចដល់​និសិ្សតដែលចាប់​ផ្តើមអាជីវកម្មបង្កើតគំរូធុរកិច្ចថ្មី និងជំរុញនិងបង្កើនបន្ថែមនូវប្រព័ន្ធធុរកិច្ចថ្មីនៅកម្ពុជា។ ក្នុងនោះ សម្រាប់ជ័យលាភីទី១ នឹងទទួលបានទឹកប្រាក់ចំនួន ៣ ៥០០ដុល្លាអាមេរិក,ជ័យលាភីទី២ នឹងទទួលបាន ២ ៥០០ដុល្លាអាមេរិក​ និងជ័យលាភីទី៣ នឹងទទួលបាន ២ ០០០ដុល្លាអាមេរិក។ ជ័យលាភីចំនួន៧ក្រុម ដែលបានឆ្លងមកវគ្គផ្តាច់ព្រ័ត្រនឹងទទួលបាន ១ ០០០ដុល្លារអាមេរិក។

សូមជម្រាបជូនអំពីការបរិច្ឆេទការទទួលពាក្យ និងវគ្គបណ្តុះបណ្តាល៖ នៅថ្ងៃទី២១ ខែឧសភា ឆ្នាំ២០២៣ ឈប់ទទួលសំណើរ, ថ្ងៃទី៣១ ខែឧសភា ឆ្នាំ២០២៣ ប្រកាសលទ្ធផលក្រុមឡើងទៅវគ្គផ្តាច់ព្រ័ត្រ, ថ្ងៃទី៩ ខែមិថុនា ដល់ថ្ងៃទី២៩ ខែកក្តដា ឆ្នាំ២០២៣ កម្មវិធីបណ្តុះបណ្តាល, ថ្ងៃទី១៣ ខែសីហា ឆ្នាំ២០២៣ ឈប់ទទួលសំណើរវគ្គផ្តាច់ព្រ័ត្រ និងថ្ងៃទី២៦ ខែសីហា ឆ្នាំ២០២៣ ការប្រកួតប្រជែងវគ្គផ្តាច់ព្រ័ត្រ៕ ដោយ ៖ បូរ៉ាវី