ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ នៅព្រឹកថ្ងៃនេះ បានរៀបចំពិធីអបអរសាទរខួបអនុស្សាវរីយ៍លើកទី១៣៧ ទិវាពលកម្មអន្តរជាតិ ១ ឧសភា ដែលប្រារព្ធឡើងក្រោមប្រធានបទ "សន្តិភាព ស្ថិរភាព មុខរបរ និងការងារ"។

ពិធីអបអរសាទរព្រឹកថ្ងៃទី១ ខែឧសភា ឆ្នាំ២០២៣នេះ បានប្រព្រឹត្តទៅក្រោមអធិបតីឯកឧត្តមបណ្ឌិត អ៊ិត សំហេង រដ្ឋមន្រ្តីក្រួងការងារ និងបណ្តុះបណ្តាលវិជ្ជាជីវៈ និងមានការអញ្ជើញ​ចូលរួមមកពី​តំណាង​អង្គការអន្តរជាតិខាងការងារ (ILO) តំណាងភាគីសហជីព និងភ្ញៀវកិត្តិយសជាច្រើននាក់ផ្សេងទៀត។

សូមបញ្ជាក់ថា ទិវាពលកម្មអន្តជាតិនេះ កើតឡើងនៅថ្ងៃទី១ ខែឧសភា ឆ្នាំ១៨៨៦ ដោយចលនា​កម្មករ​ប្រមាណជាង ៣៦ម៉ឺននាក់ បានធ្វើកូដកម្មជាង ៥០០កន្លែង នៅទីក្រុងឈីកាហ្គោ និងទូទាំង​ប្រទេសអាម៉េរិក។ ប្រធានបទនៃការទាមទារ គឺមួយថ្ងៃធ្វើការ ៨ម៉ោង សម្រាក​ទទួល​ទានដំណេក ៨ម៉ោង និងរៀនសូត លំហែកាយ ៨ម៉ោង។

មូលហេតុដោយនៅសតវត្សទី១៩ ពលករ កម្មករ នៅបណ្ដាលប្រទេសមូលធន ទទួលរងការជិះជាន់ គាបសង្កត់យ៉ាងធ្ងន់ធ្ងរ និងត្រូវបង្ខំឱ្យធ្វើការ ១០ម៉ោង ទៅ ១៦ម៉ោងក្នុងមួយថ្ងៃ។ គ្មានពេលសម្រាក គ្មានការ រៀនសូត្រ លំហែកំសាន្តទេ ជីវភាពរស់នៅផ្ទាល់ខ្លួន និងគ្រួសារ មានការលំបាកខ្លាំង។