ភ្នំពេញ៖ ខណៈព្រឹត្តិការណ៍ស៊ីហ្គេមនឹងមកដល់ដែលនៅសល់ត្រឹមតែ៤ថ្ងៃទៀតប៉ុណ្ណោះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានព្រមានប្រាប់ទៅមនុស្សមួយចំនួនដែលតែងតែ​ធ្វើការអត្ថាធិប្បាយបែបញុះញង់ចង់បំបែបបំបាក់រវាងព្រះមហាក្សត្រ និងនាយករដ្ឋមន្ត្រី ។សម្តេចទុកពេលឱ្យពួកគេនិយាយឱ្យចប់សិនសម្តេចនឹងប្រាប់ទៅពួកគេវិញថា របបប្រធានាធិបតីនិងរបបសភាគឺវាខុសគ្នាបែបម៉េច។

សម្តេចតេជោ ប្រមុខរាជរដ្ឋាភិបាលបានមានប្រសាសន៍​ប្រាប់ទៅក្រុមមនុស្សមួយទាក់ទិន នឹងនយោបាយបែបនេះ ខណៈអញ្ជើញជាអធិបតីដ៏ខ្ពង់ខ្ពស់នៅក្នុងពិធី អបអរសាទរខួប​អនុស្សាវរីយ៍លើកទី១៣៧ នៃទិវាពលកម្អន្តរជាតិ១ឧសភា ,ពិធីបើកការដ្ឋានសាងសង់​ចំណតផែកុងតឺន័រ និងពិធីអបអរសាទរ ខួបអនុស្សាវរីយ៍លើកទី៧០ នៃទំនាក់ទំនងការទូត​រវាងកម្ពុជា-ជប៉ុន នាព្រឹកថ្ងៃទី១ខែឧសភានេះ។

សម្តេច មានប្រសាសន៍ថា ការដែលគេនិយាយថា ព្រឹត្តិការណ៍ស៊ីហ្គេម មិនយាងព្រះមហាក្សត្រ​ទៅបើកស៊ីហ្គេម គឺព្រះអង្គត្រូវបានយាងទៅប្រទានភ្លើងរួច​ហើយៗសម្តេចក៏បាន​គូសបញ្ជាក់​ឱ្យ​ដឹងពី​ភាពខុសគ្នានៃរបបនយោបាយផងដែរ ដែលនៅក្នុងអាស៊ានមានតែប្រទេស៣ប៉ុណ្ណោះ ដែលប្រមុខរដ្ឋទៅប្រទានភ្លើងបើកស៊ីហ្គេមព្រោះគេជារបបប្រធានាធិបតី។

សម្ដេច មានប្រសាសន៍បន្តថា ការបើកស៊ីហ្គេមនេះចំពោះប្រទេសចិនជាករណីមួយ​ផ្សេង​ព្រោះឯកឧត្តម ស៊ីជិនពីង គាត់ជាប្រធានបក្ស។

សូមបញ្ជាក់ថា ព្រឹត្តិការណ៍ស៊ីហ្គេមដែល កម្ពុជាធ្វើជាម្ចាស់ផ្ទះ នឹង ប្រព្រឹត្តទៅពីថ្ងៃទី ៥រហូតដល់ថ្ងៃទី២៧ខែឧសភា។ដោយឡែកអាស៊ានប៉ារ៉ាហ្គេមនឹងចាប់ផ្តើម​ពីថ្ងៃទី៣ ដល់ថ្ងៃទី៩ មិថុនានាខែក្រោយ៕