ភ្នំពេញ៖ ឯកឧត្តម ហ្កាណេស ប្រាសាដ ទីមីលស៊ីណា (Ganesh Prasad Timilsina) ប្រធានរដ្ឋសភានេប៉ាល់ បានបង្ហាញការគាំទ្រ ឲ្យមានការហោះហើរត្រង់ រវាងប្រទេសកម្ពុជា និងនេប៉ាល់ ដើម្បីបង្កើនកំណើនទេចរណ៍ និងសេដ្ឋកិច្ច នៃប្រទេសទាំងអស់ពីរ។
ក្នុងជំនួបជាមួយសម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៅថ្ងៃទី១ ខែឧសភា ឆ្នាំ២០២៣ ប្រធានរដ្ឋសភានេប៉ាល់ មានប្រសាសន៍ថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអញ្ជើញទៅបំពេញទស្សនកិច្ច នៅប្រទេសនេប៉ាល់កាលពីឆ្នាំ២០១៨ ហើយ ឆ្នាំ២០១៩ នាយករដ្ឋមន្ត្រីនេប៉ាល់ បានមកបំពេញទស្សនកិច្ចនៅកម្ពុជាវិញ ដែលការផ្លាស់ប្តូរដំណើរទស្សនកិច្ចនេះ គឺជាការបង្ហាញឲ្យឃើញអំពីការរីកចម្រើន នៃទំនាក់ទំនងការទូត រវាងប្រទេសទាំងពីរ ។
ឯកឧត្តមបន្តថា ដើម្បីនាំមកនូវទេសចរណ៍ បង្កើនទំនាក់ទំនងខាងវប្បធម៌ និងសាសនា និងបង្កើនកិច្ចសហប្រតិបត្តិការ ឲ្យកាន់តែជិតស្និទ្ធថែមទៀត ប្រទេសទាំងពីរគួរមានការហោះហើរត្រង់រវាងគ្នា ពីព្រោះថា កម្ពុជា និងនេប៉ាល់ មានអ្នកគោរពប្រតិបត្តិព្រះពុទ្ធសាសនាដូចគ្នា វត្តអារ៉ាម ប្រាង្គប្រាសាទ និងកន្លែងសក្ការៈជាច្រើន សម្រាប់គោរពប្រតិបត្តិព្រះពុទ្ធសាសនា។
ឯកឧត្តម ហ្កាណេស បានបន្ថែមថា ទន្ទឹមនឹងនោះ ប្រទេសទាំងពីរ ត្រូវបន្តលើកកម្ពស់កិច្ចសហប្រតិបត្តិការរួមគ្នាជាច្រើនទៀត មានវិស័យអប់រំ សេដ្ឋកិច្ច វប្បធម៌ ពាណិជ្ជកម្ម និងហិរញ្ញវត្ថុ ដើម្បីរួមចំណែកដល់វិបុលភាព សម្រាប់ប្រទេសទាំងពីរ។
សម្តេចវិបុលសេនាភក្តី សាយ ឈុំ បានរំលឹកពីការភ្ជាប់ទំនាក់ទំនងការទូត នៃប្រទេសទាំងពីរ តាំងពីឆ្នាំ១៩៦៤ ក្រោមស្នាព្រះហស្ត ព្រះករុណាព្រះបាទសម្តេចព្រះ នរោត្តម សីហនុ “ព្រះបរមរតនកោដ្ឋ” និងថ្នាក់ដឹកនាំនេប៉ាល់ ជំនាន់មុន។
សម្តេចសម្តែងសេចក្តីរីករាយ ចំពោះការរីកចម្រើននៃទំនាក់ទំនង និងកិច្ចសហប្រតិបត្តិការរវាងប្រទេស និងប្រជាជនទាំងពីរ ដែលទំនាក់ទំនងល្អនេះ ស្តែងឡើងតាមរយៈការផ្លាស់ប្តូរទស្សនកិច្ចទៅវិញទៅមក របស់ថ្នាក់នាំជាន់ខ្ពស់ប្រទេសទាំងពីរ ការគាំទ្រគ្នាទៅវិញទៅមកក្នុងក្របខ័ណ្ឌកិច្ចសហប្រតិបត្តិការលើឆាកអន្តរជាតិ ពិសេស ក្នុងក្របខ័ណ្ឌអង្គការសហប្រជាជាតិ ដែលបានរួមចំណែកដ៏សំខាន់ដល់សន្តិភាព ស្ថិរភាព និងការអភិវឌ្ឍក្នុងតំបន់ និងពិភពលោក។
សម្តេចប្រធាន ថ្លែងអំណរគុណប្រធានរដ្ឋសភានេប៉ាល់ ផ្តល់កិតិ្តយសចូលរួមក្នុងពិធីប្រគល់គោរម្យងារ “ពុទ្ធមាមកាភិបាល នៃអង្គការពុទ្ធសាសនិកពិភពលោក” (The World Fellowship of Buddhist–The WFB) និង “បណ្ឌិតកិតិ្តយសផ្នែកមនុស្សសាស្ត្រ” ជូនសម្តេច តេជោ និងពិធីប្រគល់គោរម្យងារជា “ទីប្រឹក្សាជាន់ខ្ពស់” នៃអង្គការពុទ្ធសាសនិកពិភពលោក (WFB) ជូនឯកឧត្តមបណ្ឌិត ហ៊ុន ម៉ាណែត ដែលការប្រគល់ជូនគោរម្យងារនេះ គឺជាកិត្តិយសដ៏ឧត្ដុង្គឧត្ដម សម្រាប់ប្រជាជនកម្ពុជាទាំងមូល៕ អត្ថបទ៖ បាន សុខរិទ្ធិ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
