ក្រុមមន្ត្រីសុខាភិបាលប៉ាឡេស្ទីនបាននិយាយថា កងកម្លាំងអ៊ីស្រាអែលបានបាញ់សម្លាប់ក្មេងជំទង់ប៉ាឡេស្ទីនម្នាក់ អំឡុងពេលការវាយឆ្មក់ចាប់ខ្លួននៅពេលព្រឹក ដែលនាំឱ្យមានការប៉ះទង្គិចគ្នានៅក្នុងជំរំជនភៀសខ្លួននៅខាងក្រៅទីក្រុង Jericho ក្នុងតំបន់ West Bank នៅថ្ងៃចន្ទ (១ ឧសភា)នេះ។
ក្រសួងសុខាភិបាលប៉ាឡេស្ទីនបាននិយាយថា លោក Jibril Kamal អាយុ ១៧ ឆ្នាំបានស្លាប់បន្ទាប់ពីត្រូវបានគេបាញ់ចំក្បាល។ ក្រសួងបាននិយាយទៀតថា មនុស្ស ៦ នាក់ផ្សេងទៀតបានរងរបួសក្នុងអំឡុងពេលវាយឆ្មក់ ដោយក្នុងនោះ មនុស្ស ៣ នាក់ស្ថិតក្នុងស្ថានភាពធ្ងន់ធ្ងរ។
យោធាអ៊ីស្រាអែលបាននិយាយថា ក្នុងអំឡុងពេលវាយឆ្មក់របស់ខ្លួនលើជំរំជនភៀសខ្លួន Aqabat Jabr កងកម្លាំងរបស់ខ្លួន បានបាញ់ទៅលើជនសង្ស័យដែលបានបាញ់មកលើពួកគេ ហើយគោលដៅនោះត្រូវបានគេកំណត់អត្តសញ្ញាណ។ ការវាយឆ្មក់នៅទីក្រុង Jericho បានកើតឡើងចំពេលប្រតិបត្តិការនៅទូទាំងតំបន់ West Bank នៅថ្ងៃចន្ទនេះ ដែលបានបញ្ចប់ដោយការចាប់ខ្លួនមនុស្សយ៉ាងហោចណាស់ ១៧នាក់ និងរឹបអូសអាវុធមួយចំនួន។
អំពើហឹង្សារវាងអ៊ីស្រាអែល និងប៉ាឡេស្ទីន បានកើនឡើងនៅឆ្នាំនេះ ដោយមានការវាយឆ្មក់ និងអំពើហិង្សាជាញឹកញាប់ពីសំណាក់ក្រុមអ្នកតាំងលំនៅអ៊ីស្រាអែល ចំពេលមានការវាយប្រហាររបស់ប៉ាឡេស្ទីន។ ជនជាតិប៉ាឡេស្ទីនជាង ៩០នាក់ និងយ៉ាងហោចណាស់ជនជាតិអ៊ីស្រាអែល ព្រមទាំងជនបរទេសចំនួន ១៩ នាក់ត្រូវបានសម្លាប់ ចាប់តាំងពីខែមករាមក៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
