ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) បើកវគ្គបណ្តុះបណ្តាលស្តីពី ការឃោសនាបោះឆ្នោត ជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣ រយៈពេល២ថ្ងៃ ចាប់ពីថ្ងៃទី២ ដល់ទី៣ ខែឧសភា ឆ្នាំ២០២៣ ដល់មន្ត្រីគណបក្សនយោបាយ និងអ្នកពាក់ព័ន្ធផ្សេងៗ ខណៈការយុទ្ធនាការ ការឃោសនារកសម្លេងឆ្នោត កាន់តែខិតជិតមកដល់ ។

ក្នុងពិធីបើកវគ្គបណ្ដុះបណ្ដាល នៅថ្ងៃទី២ ខែឧសភា ឆ្នាំ២០២៣ ឯកឧត្តម ទេព នីថា អគ្គលេខាធិការ គ.ជ.ប មានប្រសាសន៍ថា វគ្គបណ្ដុះបណ្ដាលនាពេលនេះ គឺមានគោលបំណងបង្កើនសមត្ថភាព ផ្ដល់ចំណេះដឹង ​និងជំនាញបន្ថែមទៀត ពាក់ព័ន្ធនឹងការឃោសនាបោះឆ្នោត ព្រមទាំងនីតិវិធី នៃការដាក់ ការទទួល និងការដោះស្រាយពាក្យបណ្តឹង ក្នុងដំណាក់កាលឃោសនាបោះឆ្នោត ដល់សិក្ខាកាម​ ដែលជាប្រធាន គធ.ខប សមាជិក គធ.ខប ប្រធាន លគធ.ខប មន្រ្តី គ.ជ.ប តំណាងក្រសួងស្ថាប័នពាក់ព័ន្ធ តំណាងគណបក្សនយោបាយ និងតំណាងសមាគម និងអង្គការមិនមែនរដ្ឋាភិបាល ។

ឯកឧត្តមបានបន្តថា ការបណ្ដុះបណ្ដាលនេះដើម្បីត្រៀមលក្ខណៈអនុវត្ត ​និងផ្តល់កិច្ចសហការតាម​មុខការរៀងៗខ្លួន ​ប្រកប​ដោយស្មារតីទទួលខុសត្រូវខ្ពស់ ​សំដៅធានាដំណើរការឃោសនា​បោះឆ្នោតរបស់គណបក្ស នយោបាយនាពេលខាងមុខ ប្រព្រឹត្តទៅដោយរលូន មានភាពចាស់ទុំ ក្នុងបរិយាកាស សន្តិសុខសុវត្ថិភាព សណ្តាប់ធ្នាប់ល្អ និងគ្មានការឆ្លងរីករាលដាល នៃជំងឺកូវីដ-១៩ ។

ឯកឧត្តម ទេព នីថា បានរំលឹកដល់គ្រូ​ឧទ្ទេសទាំងអស់ សូមយកចិត្តទុកដាក់រៀបចំការបង្រៀន​ឱ្យ​បានល្អ និងសូមធ្វើបទបង្ហាញ ពន្យល់ ឬ/និងបកស្រាយចំណុចនីមួយៗឱ្យបានច្បាស់លាស់​ក្បោះក្បាយ​ និងតាមវិធីសាស្រ្តងាយៗ​ ដើម្បីឱ្យសិក្ខាកាមឆាប់យល់ និងឆាប់ចាំ។

ជាមួយនេះ ឯកឧត្តមអគ្គលេខាធិការ បានលើកទឹកចិត្តដល់សិក្ខាកាមទាំងអស់​ សូមចូលរួមក្នុង វគ្គ​បណ្តុះបណ្តាលនេះឱ្យបានពេញលេញ ​និងត្រូវយកចិត្តទុកដាក់ត្រង់ត្រាប់ស្តាប់ និងកត់ត្រានូវរាល់​ចំណុច​សំខាន់ៗនៃមេរៀននីមួយៗ​ ព្រមទាំង​លើក​ជាសំណួរចំពោះចំណុចណា ដែលមានភាព​មិនច្បាស់លាស់ ដើម្បីឱ្យគ្រូឧទ្ទេស ​ក៏ដូចជាថ្នាក់ដឹកនាំអគ្គលេខាធិការដ្ឋាន គ.ជ.ប ធ្វើការបំភ្លឺជូន ចៀសវាងការយល់ខុស ឬយល់មិនច្បាស់ដោយប្រការណាមួយ ដែលនាំឱ្យពេលអនុវត្តជាក់​ស្តែងគឺមិនបានត្រឹមត្រូវស្របតាមច្បាប់ បទបញ្ជា និងនីតិវិធីនៃការបោះឆ្នោត ។

ឯកឧត្តម ទេព នីថា បានបញ្ជាក់ថា រហូតដល់ពេលនេះ ​មានគណបក្សនយោបាយចំនួន៧ហើយ បានចុះឈ្មោះចូលរួមការបោះឆ្នោតជ្រើសរើស​តំណាងរាស្ត្រ ​នីតិកាលទី៧ ​និង​កំពុងពិនិត្យលក្ខន្តិកៈ គណបក្សនយោបាយចំនួន ២ទៀត ៕អត្ថបទ បាន សុខរិទ្ធិ