សេតវិមានបាននិយាយកាលពីថ្ងៃចន្ទថា សហរដ្ឋអាមេរិក នឹងបញ្ចប់កាតព្វកិច្ចវ៉ាក់សាំងបង្ការវីរុស COVID-19 សម្រាប់អ្នកដំណើរបរទេស និងបុគ្គលិកសហព័ន្ធ នៅថ្ងៃទី១១ខែឧសភា នៅពេលបញ្ចប់គ្រាអាសន្នសុខភាពសាធារណៈនៃវីរុសកូរ៉ូណា។

កាលពីខែកុម្ភៈ សភាសហរដ្ឋអាមេរិក បានបោះឆ្នោតដកវិធានការដែលអ្នកដំណើរបរទេស​ភាគច្រើន ​ត្រូវបានចាក់វ៉ាក់សាំងបង្ការវីរុស​ COVID-19 មួយក្នុងចំណោមការរឹតត្បិតការធ្វើដំណើរ​ទប់ស្កាត់ការឆ្លងរាលដាលវីរុសសកលមួយចំនួន​ដែលនៅតែបន្តអនុវត្តន៍។

រដ្ឋបាលលោក Biden ​កាលពីខែមិថុនា ឆ្នាំមុន ​បានដកតម្រូវការរបស់ខ្លួនដែលថា អ្នកដែលបានចូល​ទៅសហរដ្ឋអាមេរិកតាមជើងយន្តហោះ ត្រូវតែមានលទ្ធផលធ្វើតេស្តអវិជ្ជមានCOVID-19 តែបាន​បន្តអនុវត្តន៍ការចាក់វ៉ាក់សាំងជាកាតព្វកិច្ចសម្រាប់អ្នកដំណើរបរទេសភាគច្រើន តាមវិធានការរបស់​មជ្ឈមណ្ឌលគ្រប់គ្រងនិងបង្ការជំងឺឆ្លង។

សេតវិមាន បាននិយាយថា ខណៈដែលការចាក់វ៉ាក់សាំងនៅតែជាឧបករណ៍មួយក្នុង​ចំណោម​ឧបករណ៍សំខាន់បំផុតជាច្រើន សម្រាប់សុខភាព​ និងសុវត្ថិភាពរបស់ក្រុមបុគ្គលិក និង​ជំរុញឲ្យមានប្រសិទ្ធភាពនៅកន្លែងការងារ ​ពេលនេះ យើងកំពុងស្ថិតក្នុងដំណាក់​កាល​ខុសគ្នានៃការឆ្លើយតបរបស់យើង​ នៅពេលវិធានការទាំងនោះលែងចាំបាច់។

ទោះបីជាករណីឆ្លងវីរុស Covid-19 ​ ចំនួនអ្នកជំងឺចូលសម្រាកនៅមន្ទីរពេទ្យ និងស្លាប់ បានថយ​ចុះខ្លាំង នៅឆ្នាំនេះ តែវីរុសនេះ នៅតែបន្តសម្លាប់មនុស្សជាង១ពាន់នាក់ក្នុងមួយសប្ដាហ៍ ៕