ភ្នំពេញ៖ សមាជិកព្រឹទ្ធសភាជាតិ បានឯកភាពទាំងស្រុង ដោយឥតកែប្រែ ទៅលើសេចក្តីព្រាងច្បាប់​ចំនួន៣ បន្ទាប់ពីបានពិនិត្យ និងឲ្យយោបល់ក្នុងសម្លេង៥៧ នៃចំនួនសមាជិកព្រឹទ្ធសភាទាំងមូល ។

បន្ទាប់ពីសម័យប្រជុំលើកទី១០ នីតិកាលទី៤ នៅថ្ងៃទី២ ​ខែឧសភា ឆ្នាំ២០២៣ ក្រោមអធិបតីភាព​សម្តេចវិបុលសេនាភក្តី សាយ ឈុំ ប្រធានព្រឹទ្ធសភាជាតិ ឯកឧត្តម ម៉ម ប៊ុននាង អ្នកនាំពាក្យរដ្ឋសភា មានប្រសាសន៍ថា សេចក្តីព្រាងច្បាប់ទាំងនោះ រួមមានច្បាប់ស្តីពី សារពើពន្ធ តាក់តែងក្នុងគោលបំណង ដើម្បីធានាបាននូវចីរភាព នៃការកៀរគរប្រមូលចំណូល និងកំណើន​សេដ្ឋកិច្ច ការប្រកួតប្រជែងដោយស្មើភាព យុត្តិធម៌ និងសមធម៌សង្គម ព្រមទាំងបន្តលើកកម្ពស់​គុណភាពសេវា ជូនអ្នកជាប់ពន្ធឱ្យមានភាពសាមញ្ញ​ និងងាយស្រួលក្នុងការបង់ពន្ធ ស្របតាម​យុទ្ធសាស្រ្តចតុកោណ ដំណាក់កាលទី៤ កម្មវិធីកែទម្រង់ការគ្រប់គ្រងហិរញ្ញ-វត្ថុសាធារណៈ និងយុទ្ធសាស្ត្រកៀរគរចំណូល ។

ឯកឧត្តមបន្តថា សេចក្តីព្រាងច្បាប់នេះ ​ជាឧបករណ៍គតិយុត្តមួយដែលមានលក្ខណៈពេញ​លេញ​គ្រប់ជ្រុងជ្រោយ និងជាចំណែកមួយយ៉ាងសំខាន់​ ក្នុងការចូលរួមកែទម្រង់មុតស្រួច និងស៊ីជម្រៅ​របស់​រាជរដ្ឋាភិបាល ក្នុងការកៀរគរ និងប្រមូលចំណូលប្រកបដោយប្រសិទ្ធភាព តម្លាភាព គណនេយ្យភាព និងភាពជឿទុកចិត្តបាន ។

ឯកឧត្តមបន្តថា ចំពោះសេចក្តីព្រាងច្បាប់ទី២ គឺច្បាប់ស្តីពីលទ្ធកម្មសាធារណៈ រៀបចំឡើងក្នុង​គោលបំណង ​ដើម្បីធានាបាននូវភាពជឿទុកចិត្តតម្លាភាព ប្រសិទ្ធភាព ​ការប្រកួតប្រជែង និងការ​សន្សំសំចៃ ព្រមទាំងស្របតាមឧត្តមានុវត្តន៍អន្តរជាតិដោយប្រែក្លាយ​តួនាទីរបស់ក្រសួងសេដ្ឋកិច្ច និងហិរញ្ញវត្ថុ ទៅជានិយ័តករ ​និងសវនកម្មកិច្ចលទ្ធកម្ម ​ចំណែកស្ថាប័នអនុវត្តលទ្ធកម្មនឹងត្រូវ​បានផ្តល់សិទ្ធិអំណាច និងការទទួលខុសត្រូវ ​ជាមួយនឹងគណនេយ្យភាពពេញលេញ​ក្នុងការអនុវត្តកិច្ចលទ្ធកម្មរបស់ខ្លួន ។

ឯកឧត្តម ម៉ម ប៊ុននាង បន្ថែមថា សេចក្តីព្រាងច្បាប់ទី៣ គឺច្បាប់ស្តីពី ការអនុម័តយល់ព្រម​លើកិច្ចព្រមព្រៀងស្តីពី ពាណិជ្ជកម្មតាមព្រំដែនរវាងកម្ពុជា-វៀតណាម តាក់តែងឡើងមាន​គោលបំណងបង្កើតក្របខ័ណ្ឌគតិយុត្ត និងលក្ខខណ្ឌអនុគ្រោះ ដល់ការធ្វើពាណិជ្ជកម្ម ព្រមទាំងធ្វើឱ្យប្រសើរឡើង និងលើកកម្ពស់ជីវភាពរបស់ប្រជាជន រស់នៅតាមព្រំដែន នៃប្រទេសទាំងពីរ ពង្រឹងមិត្តភាព កិច្ចសហប្រតិបត្តិការ និងទំនាក់ទំនងគ្រប់ជ្រុងជ្រោយ និងការអភិវឌ្ឍប្រកបដោយចីរភាព បង្កើតការតភ្ជាប់ការអភិវឌ្ឍយូរអង្វែង មានស្ថិរភាព និរន្តរភាព សម្រាប់ប្រជាជន នៃប្រទេសទាំងពីរ ។

អ្នកនាំពាក្យព្រឹទ្ធសភា បញ្ជាក់ថា កិច្ចព្រមព្រៀងនេះ នឹងចូលរួមចំណែកក្នុងការអនុវត្តនូវយុទ្ធសាស្រ្ត ក្នុងការបន្តពង្រឹងការតភ្ជាប់ផ្នែកធុរកិច្ច ​សំដៅលើកកម្ពស់ការចាប់ដៃគូពាណិជ្ជកម្ម និងការធ្វើ​ពិពិធកម្មទីផ្សារ ​និងមុខទំនិញនាំចេញ ​តាមរយៈការផ្តល់ឱកាសការងារ ​ឱកាសធុរកិច្ច ជំរុញ​ផលិតកម្ម និងអាជីវកម្មគ្រួសារដែលនឹងជួយជំរុញលើកកម្ពស់ ​និងធ្វើឱ្យជីវភាពរបស់ប្រជាជនកម្ពុជា ដែលរស់នៅតាមព្រំដែនជាមួយវៀតណាម មានភាពល្អប្រសើរឡើង ៕ អត្ថបទ បាន សុខរិទ្ធិ