ធនាគារ First Republic Bank បានក្លាយជាធនាគារក្នុងស្រុកចុងក្រោយបំផុតរបស់សហរដ្ឋអាមេរិក ដែលមានការតាមដានខ្លាំង ក្រោយការដួលរលំធនាគារធំបំផុតទី២និងទី៣ ក្នុងប្រវត្តសាស្ត្រសហរដ្ឋអាមេរិក។

យោងតាមរបាយការណ៍ហិរញ្ញវត្ថុដែលបានចេញផ្សាយកាលពីសប្ដាហ៍មុន ភាគហ៊ុនរបស់ ធនាគារនេះ បានធ្លាក់ចុះ៩៥ % នៃតម្លៃរបស់ខ្លួន ចាប់តាំងពីវិបត្តិប្រព័ន្ធធនាគារក្នុងស្រុក​បានផ្ទុះឡើងកាលពីថ្ងៃទី៨ខែមីនា និងប្រាក់បញ្ញើជាង១០០ពាន់លាន ត្រូវបានម្ចាស់ដកចេញ ពីធនាគារនេះ ក្នុងត្រីមាសដំបូង ។

មន្ទីរនវានុវត្តន៍ និងការពារហិរញ្ញវត្ថុរដ្ឋ California (DFPI) បាននិយាយកាលពីថ្ងៃចន្ទថា ក្រុមនិយតករ ​បានរឹបអូសយកធនាគារ First Republic Bank នូវអ្វីដែលជាការក្ស័យធនធនាគារធំទី៣​របស់សហរដ្ឋអាមេរិក ក្នុងរយៈពេល២ខែ បន្ទាប់ពីការដួលរលំធនាគារ Silicon Valley Bank និងធនាគារ Signature Bank។

ក្រុមអ្នកវិភាគ រំពឹងថា ភាពចលាចលផ្នែកប្រព័ន្ធធនាគារនៅសហរដ្ឋអាមេរិក ​នឹងបន្តរង្គោះរង្គើ​ដល់ធនាគារជាច្រើនទៀត ដែលពួកគេបានព្រមានថា អាចទាញទម្លាក់កំណើនសេដ្ឋកិច្ចនៅក្នុង​សហរដ្ឋអាមេរិក។

លោក Wang Tianyang សាស្ត្រាចារ្យរង ផ្នែកអចលនទ្រព្យនិងហិរញ្ញវត្ថុនៅសាកលវិទ្យាល័យ Colorado State បាននិយាយថា ភាពវឹកវរផ្នែកប្រព័ន្ធធនាគារនៅសហរដ្ឋអាមេរិក នៅមិនទាន់ចប់ទេ៕