កូឡុំប៊ី៖ កាលពីថ្ងៃអង្គារ សហគមន៍អន្តរជាតិបានអំពាវនាវ នូវអ្វីដែលអង្គការសហប្រជាជាតិ (UN) ចាត់ទុកថា ជាការប្រើប្រាស់កម្លាំងច្រើនដោយកងកម្លាំងសន្តិសុខ នៅក្នុងប្រទេសកូឡុំប៊ី ក្រោយមនុស្សស្លាប់ជាច្រើននាក់ អំឡុងរយៈពេលប៉ុន្មានថ្ងៃនៃបាតុកម្មប្រឆាំងនឹងរដ្ឋាភិបាល។
អង្គការសហប្រជាជាតិ សហរដ្ឋអាមេរិក សហភាពអឺរ៉ុប និងក្រុមសិទ្ធិមនុស្សបានចូលរួមរិះគន់ ក្រោយទិន្នន័យផ្លូវការបង្ហាញថា មនុស្ស ១៩នាក់ស្លាប់ និង ៨៤៦នាក់ផ្សេងទៀតបានរងរបួស អំឡុងការប៉ះទង្គិចគ្នាជាមួយកងកម្លាំងសន្តិសុខ។ ក្រុមសិទ្ធិមនុស្សកូឡុំប៊ី ដែលជាទីភ្នាក់ងាររដ្ឋឯករាជ្យបង្កើតឡើងដោយរដ្ឋាភិបាល បាននិយាយថា មនុស្ស ៨៩នាក់បានចុះបញ្ជីថាបាត់ខ្លួន។
គួរឲ្យដឹងថា ពលរដ្ឋកូឡុំប៊ីរាប់ម៉ឺននាក់បានចូលរួមដង្ហែក្បួនតាមដងផ្លូវ នៅក្នុងបាតុកម្មដែលបានចាប់ផ្ដើមកាលពីថ្ងៃពុធសប្ដាហ៍មុន ប្រឆាំងកំណែទម្រង់ពន្ធគយស្នើសុំ ប៉ុន្តែចាប់តាំងពីពេលនោះមកបាតុកម្មកាន់តែរីកសាយធំ ប្រឆាំងនឹងលោកប្រធានាធិបតី អ៊ីវ៉ាន់ ឌូក្វេ។ កាលពីថ្ងៃអង្គារ ក្រុមបាតុករបានបិទផ្លូវនៅតាមតំបន់ជាច្រើនទូទាំងប្រទេស ក្នុងនោះក៏រួមមានការធ្វើបាតុកម្មនៅក្នុងរដ្ឋធានីបូហ្គោតា និងទីក្រុងកាលីស្ថិតនៅភាគខាងលិចប្រទេស៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
