អគ្គនាយ នៃអគ្គនាយកដ្ឋានសេវាសង្គមកិច្ច នៃក្រសួងសង្គមកិច្ច អតីតយុទ្ធជន និងយុវនីតិ​សម្បទា លោក តូច ចាន់នី បានស្នើដល់អង្គការសង្គមស៊ីវិលទាំងឡាយណា ដែលធ្វើ​កិច្ច​ការងារ​ក្នុង​សង្គម ជាពិសេសទាក់ ទងនិងកុមារ សូមកុំយករឿងនយោបាយមកលាយឡំ ហើយ​ប្រសិន​លោក​មើល​ឃើញថា អង្គការនោះយករឿងកុមារ និងសង្គមមកពាក់ព័ន្ធនយោបាយនោះ លោក​នឹងចាត់វិធានការទៅតាមច្បាប់ជាធរមាន។

នៅក្នុងកម្មវិធីចុះហត្ថលេខាលើកិច្ចព្រមព្រៀងគម្រោងកម្មវិធីបន្ត រវាងក្រសួងសង្គមកិច្ច អតីតយុទ្ធ ជន និងយុវិនីតិសម្បទាជាមួយនិងអង្គការចំនួន២២ទាក់ទង និងកិច្ចការពារកុមារ នៅថ្ងៃទី២ ខែ​ឧសភា ឆ្នាំ ២០២៣នេះ លោក តូច ចាន់នី បានលើកឡើងថា អង្គការខ្លះបានធ្វើកិច្ចព្រមព្រៀង​ជាមួយ​រាជ​រដ្ឋាភិបាល ថាជួយរាជរដ្ឋាភិបាលក្នុងកិច្ចការពារសង្គម និងកុមារ ប៉ុន្តែពួកគេបែ​ជា​យក​កុមារ​ធ្វើ​ជា​ឡេសវាយប្រហារ ដល់រដ្ឋាភិបាល​ដើម្បី​កេង​ចំណេញ​នយោបាយ​របស់​ពួក​ផង​ខ្លួន​ទៅ​វិញ។

លោកតួច ចាន់នីបានលើកឡើងថា រដូវនេះគឺជារដូវនយោបាយ ហើយ​លោកតែងតែ​លើក​នូវ​គ្រប់​កម្ម​វិធី​ដោយរំលឹកដល់អង្គការដៃគូទាំងអស់ ដែលធ្វើកិច្ចការងារ​សង្គម​សូម​កុំ​យក​រឿង​នយោបាយ​មក​លាយ​ឡំ​ជាមួយរឿងសង្គម ដោយបញ្ហានេះលោក​បានមើលឃើញអង្គការមួយ​ចំនួនហើយ​ដែល​ធ្វើបែ​បនេះ។ លោកបានបញ្ជាក់ថា ការធ្វើនយោបាយរបស់បុគ្គលគឺជាសិទ្ធរបស់ពួកគេ ហើយ​ការ​ស្រលាញ់គណ បក្សណាមួយគឺជាសិទ្ធិរបស់គេដែរ ប៉ុន្តែសូម​កុំ​យក​រឿងក្មេងៗ​ជួប​បញ្ហា​បន្តិច​បន្ទួច​យកមកបង្ហោះ និងធ្វើរបាយការណ៍ ដោយចោទប្រកាន់រាជរដ្ឋាភិបាលមិនអើពើ និង​មិន​គិតគួរ​ដល់ពួកគេ ដោយការធ្វើបែបនេះគឺ វាខុសពីវិជ្ជាជីវៈ​ដែល​យើង​បាន​ព្រម​ព្រៀងជាមួយ​គ្នា​នោះ​។

លោកតូច ចាន់នី បានសង្កត់ធ្ងន់ថា« សូមកុំយករឿងបែបនេះ​មក​កេង​ចំណេញ​នយោបាយ​ខ្លួន​ឯង​ គឺមិនអាចនោះទេ ប្រសិនបើខ្ញុំដឹង និងរកឃើញ ខ្ញុំនឹង​ចាត់​វិធា​ន​ការ​ហើយ​…​តែ​យ៉ាង​ណា​យើង​បាន​រក ឃើញមួយចំនួនហើយដោយគាត់បានយករូបកូនក្មេងដែលជួបការលំបាក យក​មក​ថត​បង្ហោះ ដោយបានចោទប្រកាន់ថារាជរដ្ឋាភិបាលមិនបានយកចិត្តទុកដាក់ដល់ក្មេងៗ ទាំង​នោះ​ទេ ហើយខណៈដែលគាត់ថតក្មេង ជនពិការ និងជនអនាថា​ទាំង​នោះ​មក​បង្ហោះ​គឺ​មិន​បាន​បិទ​មុខ ដល់ពួកគេនោះទេ ដែលនេះបាន​ធ្វើ​ឲុ្យ​មាន​ការ​ប៉ះពាល់​ដល់​ជីវិត​ឯក​ជន​របស់​ក្មេងៗ​ទាំង​នោះ​ផង​ដែរ​»។

លោកបានបន្តទៀតថា ការលើកឡើងរបស់លោកបែបនេះគឺមិនមែនជាការគំរាមកំហែង ដល់អង្គ ការណានោះទេ ប៉ុន្តែលោក​ធ្វើ​នេះ​គឺ​ស្រប់​ទៅ​តាម​ការ​ព្រមព្រៀង​គ្នា​របស់​អង្គការ​ទាំង​នោះ​ជាមួយ​ក្រសួង​សង្គមកិច្ច អតីតយុទ្ធជន និងយុវនីតិសម្បទាតែប៉ុណ្តោះ៕