ភ្នំពេញ៖ ផ្លូវសំខាន់ៗមួយចំនួនក្នុងរាជធានីភ្នំពេញ ពិសេសតម្រាយផ្លូវជុំវិញ មហាវិថីឈ្នះឈ្នះ ត្រូវបានអាជ្ញាធររាជធានីភ្នំពេញ ធ្វើការផ្អាកជាបណ្តោះអាសន្ន ចំពោះរថយន្តដឹកទំនិញធុនធ្ងន់ , រថយន្តដឹកដី,រថយន្តដឹកខ្សាច់ និងរថយន្តកុងតឺន័រទាំងអស់ មិនអនុញ្ញាតឱ្យមានការធ្វើ​ចរាចរណ៍​នោះឡើយ គិតចាប់ពីថ្ងៃទី០៣ ខែឧសភា ដល់ថ្ងៃទី១៧ ខែឧសភា ឆ្នាំ២០២៣ ។

ដងផ្លូវសំខាន់ៗដែលអាជ្ញាធររាជធានីភ្នំពេញ សម្រេចហាមឃាត់រថយន្តធុនធំមួយចំនួនផ្អាក​ជា​បណ្តោះអាសន្នមិនអោយឆ្លងកាត់នោះ រួមមាន៖ ផ្លូវជាតិលេខ៦ គឺគិតចាប់ពីរង្វង់មូលព្រហ្មបាយ័ន្ត រហូតដល់ព្រុំប្រទល់រាជធានីភ្នំពេញ​ និងខេត្តកណ្តាល , កំណាត់មហាវិថីឈ្នះ ឈ្នះ ( ហាមឃាត់​គិតចាប់​ពីផ្លូវជាតិលេខ៦ រហូតដល់មហាវិថីមិត្តភាពភ្នំពេញ-ហាណូយ ) , និងកំណាត់​មហាវិថី​មិត្តភាពភ្នំពេញ ហាណូយ ( គិតចាប់ពីមហាវិថីឈ្នះ ឈ្នះ រហូតដល់មហាវិថីសហព័ន្ធរុស្ស៊ី ) មិន​អនុញ្ញាតឱ្យធ្វើចរាចរ ​ចាប់ពីថ្ងៃទី០៣ រហូតដល់ថ្ងៃទី១៧ ខែឧសភា ឆ្នាំ២០២៣ ។ ដែលដងផ្លូវ និង​មហាវិថីទាំងនេះ ​គឺជាផ្លូវសំខាន់ ​ដែលគណៈប្រតិភូ ​និងកីឡាករត្រូវធ្វើដំណើរឆ្ពោះ​ទៅ​កាន់ពហុកីឡដ្ឋាន ។

ផ្អែកតាមការជូនដំណឹងរបស់អាជ្ញាធររាជធានី ​ក្រោយការផុតរយៈពេលហាមឃាត់បណ្តោះអាសន្ន​នេះហើយនោះ ​រដ្ឋបាលរាជធានីភ្នំពេញ នឹងបើកឱ្យចរាចរជាធម្មតាវិញ ។

សូមបញ្ជាក់ថា នៅសល់តែ២ថ្ងៃទៀតប៉ុណ្ណោះ ព្រឹត្តិការណ៍កីឡាអាស៊ីអាគ្នេយ៍ ​ឬស៊ីហ្គេមលើកទី៣២ ក៏នឹងចូលមកដល់នោះ​ ពោលគឺចាប់បើក នៅថ្ងៃទី០៥ ខែឧសភា ដល់ថ្ងៃទី១៧ ​ខែឧសភា ឆ្នាំ​២០២៣ ។ ​ដោយពិធីបើកនោះ ​ធ្វើឡើងក្រោមអធិបតីភាពដ៏ខ្ពង់ខ្ពស់​សម្តេច​តេជោ ហ៊ុន សែន នាយករដ្ឋមន្ត្រីកម្ពុជា ដែលប្រារព្ធឡើងនៅពហុកីឡដ្ឋានជាតិ មរតកតេជោ ដែលស្ថិតនៅ​ភូមិព្រែកតារ័ត្ន ​សង្កាត់ព្រែកតាសេក​ ខណ្ឌជ្រោយចង្វារ រាជធានីភ្នំពេញ ។

ទន្ទឹមថ្ងៃប្រារព្ធមហាព្រឹត្តិការណ៍កីឡាខាងលើនេះដែរ ​អាជ្ញាធររាជធានី បាន​ធ្វើការ​បញ្ចៀស​ចរាចរ និង​ផ្អាកចរាចរជាបណ្តោះអាសន្នជុំវិញទីតាំងប្រារព្ធពិធី​ដោយ​មិន​អនុញ្ញាត​ឱ្យយានជំនិះគ្រប់ប្រភេទ​ឆ្លងកាត់កំណាត់មហាវិថីឈ្នះឈ្នះ​ ចាប់ពីគល់ស្ពានព្រែកព្នៅរហូតដល់ផ្លូវជាតិលេខ៦ ​នៅថ្ងៃទី០៥ ខែ​ឧសភា ឆ្នាំ២០២៣ និងនៅថ្ងៃទី១៧ ​ខែឧសភា ឆ្នាំ២០២៣​ រហូត​ដល់​បញ្ចប់​កម្មវិធី​សម្រាប់​ថ្ងៃនីមួយៗ​ ដើម្បីឱ្យពិធីខាងលើប្រព្រឹត្តទៅដោយរលូន​ រក្សាបាននូវសន្តិសុខ​ សុវត្ថិភាព សណ្តាប់ធ្នាប់ ​និងរបៀបរៀប ​រយសាធារណៈ ៕ អត្ថបទ៖ លីហេង /កុម្ភះ