​ក្រុម​ឧ​ត្ត​ម​សេនីយ​មី​យ៉ាន់​ម៉ា​និយាយថា​ពួកគេ​បាន​លើកលែងទោស​ដល់​អ្នកទោស​នយោបាយ​ជាង​២.០០០​នាក់ ក្នុងឱកាស​ប្រារព្ធ​ពិធីបុណ្យ​វិសាខបូជា ដែលជា​ថ្ងៃបុណ្យ និង​ជា​វិស្សមកាល​ដ៏​សំខាន់​ខាង​ព្រះពុទ្ធសាសនា​។​

​សារព័ត៌មាន Myanmar Now បាន​រាយការណ៍​នៅ​ថ្ងៃ​ពុធ​នេះ ​ដោយ​សំអាង​ដល់​សេចក្តីថ្លែងការណ៍​មួយ​ដែល​ត្រូវបាន​ចុះហត្ថលេខា​ដោយ​អគ្គលេខាធិការ​ក្រុមប្រឹក្សា​យោធា ឧ​ត្ត​ម​សេនីយ៍​ឯក​លោក Aung Lin Dwe ថា យោធា​បាន​និយាយថា មនុស្ស​ចំនួន ២.១៥៣ នាក់​ដែល​ត្រូវ​ជាប់ពន្ធនាគារ​ពីបទ "​ញុះញង់​" នឹង​ត្រូវបាន​ដោះលែង​ដោយ​ផ្អែកលើ "​ហេតុផល​មនុស្សធម៌​" ។​

​យោធា​មី​យ៉ាន់​ម៉ា បាន​បង្ក្រាប​គូប្រជែង​របស់ខ្លួន​ដោយ​ប្រើ​កម្លាំង​ដ៏​គ្រោះថ្នាក់​និង​បាន​ឃុំខ្លួន​មនុស្ស​រាប់ពាន់នាក់​ចាប់តាំងពី​ការដណ្តើម​អំណាច​ពី​រដ្ឋាភិបាល​ជាប់ឆ្នោត​របស់លោក​ស្រី Aung San Suu Kyi ក្នុង​រដ្ឋប្រហារ​ខែកុម្ភៈ ឆ្នាំ ២០២១​។​

​មី​យ៉ាន់​ម៉ា​បាន​ដោះលែង​អ្នកទោស​ជាង ៣.០០០​នាក់ ក្នុងឱកាស​ប្រារព្ធ​ពិធីបុណ្យ​ចូលឆ្នាំថ្មី​ប្រពៃណី​របស់ខ្លួន​កាលពី​ខែ​មុន ប៉ុន្តែ​នៅក្នុង​ឱកាស​នោះ មិនបាន​និយាយ​ជាក់លាក់​ថា ក្រុម​អ្នកទោសនយោបាយ​នឹង​ស្ថិត​ក្នុងចំណោម​អ្នក​ដែល​ត្រូវបាន​ដោះលែង​នោះ​ឬ​យ៉ាងណាទេ​៕​