មូលនិធិរូបិយវត្ថុអន្តរជាតិ (IMF) កាលពីថ្ងៃអង្គារបានព្យាករថាសេដ្ឋកិច្ចក្នុងតំបន់អាស៊ី-ប៉ាស៊ីហ្វិក នឹងកើនឡើង៤,៦% ក្នុងឆ្នាំ ២០២៣ ពីកំណើន ៣,៨% កាលពីឆ្នាំមុន នេះបើយោងតាមរបាយការណ៍ចុងក្រោយបង្អស់នៃចក្ខុវិស័យសេដ្ឋកិច្ចក្នុងតំបន់។
របាយការណ៍នេះ បាននិយាយថា តំបន់នេះនឹងរួមចំណែកប្រហែល៧០% នៃកំណើនសេដ្ឋកិច្ចសកលនៅឆ្នាំនេះ ស្របពេលនឹងសន្ទុះថ្មីនៃការបើកដំណើរការឡើងវិញរបស់ប្រទេសចិន ។
មូលនិធិរូបិយវត្ថុអន្តរជាតិ (IMF) បាននិយាយថា កំណើនសេដ្ឋកិច្ចពិភពលោកនឹងធ្លាក់ចុះ ខណៈដែលកំណើនអត្រាការប្រាក់ និងជម្លោះភូមិសាស្ត្រនយោបាយ ប៉ះពាល់ដល់សកម្មភាពសេដ្ឋកិច្ច ស្របពេលភាពរង្គោះរង្គើខាងធនាគារនៅសហរដ្ឋអាមេរិក និងអឺរ៉ុប បានរួមបញ្ចូលភាពមិនច្បាស់លាស់កាន់តែខ្លាំងលើចក្ខុវិស័យសេដ្ឋកិច្ច។
ទន្ទឹមនឹងនេះដែរ មូលនិធិរូបិយវត្ថុអន្តរជាតិក៏បាននិយាយថា ការងើបឡើងវិញនៃសេដ្ឋកិច្ចរបស់ប្រទេសចិន និងកំណើនសេដ្ឋកិច្ចរបស់ប្រទេសឥណ្ឌា បានផ្តល់នូវកម្លាំងជំរុញដ៏សំខាន់សម្រាប់ភាពរឹងមាំនៃសេដ្ឋកិច្ចក្នុងតំបន់។ ប្រទេសដែលមានសេដ្ឋកិច្ចទើបលូតលាស់ផ្សេងទៀត នៅក្នុងតំបន់ កំពុងកើនឡើងជាលំដាប់ ទោះបីជាក្នុងករណីខ្លះតិចជាងឆ្នាំមុនបន្តិចក៏ដោយ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
