ព្រះសីហនុ៖ ថ្ងៃទី២នៃការប្រកួតកីឡាទូកក្តោង ថៃបន្តឈរលេខរៀងទី១ ខណៈកម្ពុជានៅលេខរៀងទី៤ ក្នុងចំណោម​ប្រទេស​ទាំង៦ ដែលចូលរួមប្រកួតកីឡាស៉ីហ្គេម ប្រភេទកីឡាទូកក្តោងនៅខេត្តព្រះសីហនុ។

នៅថ្ងៃទី៣ ខែឧសភា ឆ្នាំ២០២៣ ខេត្តព្រះសីហនុ បានបន្តការប្រកួតកីឡាស៉ីហ្គេម ប្រភេទកីឡាទូកក្តោង ដែលមាន​កីឡាករ កីឡាការិនី ចូលរួមមកពី៦ប្រទេស រួមមាន កម្ពុជា ថៃ វៀតណាម សិង្ហបុរី ហ្វីលីពីន និងម៉ាឡេស៉ី ដែលមាន​រយៈពេលមួយសប្តាហ៍ ពីថ្ងៃទី២ ដល់ថ្ងៃទី៨ ខែឧសភានេះ។ បើតាមលោក សោមសុទ្ធ រិទ្ធពង្ស អគ្គលេខាធិការ សហព័ន្ធកីឡាទូកក្តោងកម្ពុជា បានឲ្យដឹងថា ចំពោះទិដ្ឋភាពនៃការប្រកួតថ្ងៃទី២នេះ បានជួបប្រទះ​ឧបសគ្គបន្តិចបន្តួច​ដោយសារ​ភ្លៀង និងបរិមាណខ្យល់មិនគ្រប់គ្រាន់ ទើបបណ្តាលឲ្យលុបចោលការប្រកួតនៃជុំទី១ ក្នុងចំណោម​វិញ្ញាសារទាំង៩។

លោក សោមសុទ្ធ រិទ្ធពង្ស បញ្ជាក់ថា ជាលទ្ធផលក្នុងការប្រកួតថ្ងៃទី២ ប្រទេសថៃនៅតែបន្តនាំមុខដោយពិន្ទុខ្ពស់ជាងគេ ហើយទី២គឺសិង្ហបុរី ទី៣ម៉ាឡេស៉ី ខណៈកម្ពុជាឈរនៅលេខរៀងទី៤។

ជាមួយគ្នានេះ កីឡាករទូកក្តោងមកពីប្រទេសថៃ បានលើកឡើងថា ការប្រកួតកីឡាទូកក្តោងនៅកម្ពុជា​ពិតជារៀបចំបានយ៉ាងល្អ ទាំងការកំណត់ទីតាំងប្រកួត និងការយកយកចិត្តទុកដាក់ដល់កីឡាករគ្រប់រូប។

ខេត្តព្រះសីហនុ ត្រូវបានរៀបចំការប្រកួតកីឡាស៉ីហ្គេម ចំនួន៣ប្រភេទ ទី១.កីឡាទូកក្ដោង, ទី២កីឡាជេតស្គី ឬម៉ូតូទឹកនៅទីលានតេជោ និងឆ្នេរសុខា ហើយគ្រោងចាប់ផ្តើមប្រកួតនាថ្ងៃទី១៣ ខណៈកីឡាបាល់ទះលើឆ្នេរខ្សាច់ ធ្វើឡើងនៅឆ្នេរជំទាវម៉ៅ ក៏នឹងចាប់ផ្តើមនាថ្ងៃទី១១ខាងមុខ៕ ដោយ ៖ ឧត្ដម