មន្ត្រីរុស្ស៊ីម្នាក់ បាននិយាយថា ឃ្លាំងស្តុកប្រេងឥន្ធនៈមួយកន្លែង បានរងការឆាបឆេះនៅព្រឹកថ្ងៃពុធនេះ នៅជិតស្ពានសំខាន់មួយកន្លែងតភ្ជាប់តំបន់ដីគោករបស់រុស្ស៊ីជាមួយតំបន់គ្រីមៀ ប៉ុន្មានថ្ងៃបន្ទាប់ពីទីក្រុងមូស្គូ បានដាក់កំហុសលើអ៊ុយក្រែន សម្រាប់ការវាយប្រហារដែលបានបណ្តាលឃ្លាំងប្រតេងឥន្ធនៈឆាបឆេះ ក្នុងតំបន់ Sevastopol។
អណ្តាតភ្លើង និងផ្សែងខ្មៅ បានហុយឡើងនៅលើអ្វីដែលទំនងជាអាងស្តុកដ៏ធំដែលមានសរសេរព្រមានព័ណ៌ក្រហមថា «ងាយឆេះ» នៅក្នុងវីដេអូ ដែលបានបង្ហោះនៅលើប្រព័ន្ធផ្សព្វផ្សាយសង្គមរុស្ស៊ី ទោះបីជាសារព័ត៌មានរ៉យទ័រ ពុំអាចផ្ទៀងផ្ទាត់បានដោយឯករាជ្យក៏ដោយ ទាំងសេចក្តីរាយការណ៍ពីអគ្គិភ័យ និងវីដេអូ។
លោក Veniamin Kondratyev អភិបាលតំបន់ Krasnodar ដែលលាតសន្ធឹងលើសមុទ្រ Azov ពីប្រទេសអ៊ុយក្រែន បាននិយាយនៅលើកម្មវិធីផ្ញើសារបណ្តាញតេឡេក្រាមថា អគ្គិភ័យនេះ ត្រូវបានចាត់ថ្នាក់ក្នុងកម្រិតខ្ពស់បំផុតនៃការលំបាក ប៉ុន្តែលោកបាននិយាយថាពុំមានអ្នកស្លាប់ឬរងរបួសនោះទេ។
ឧបទ្ទវហេតុនេះ បានកើតឡើង ជាច្រើនថ្ងៃបន្ទាប់ពីការវាយប្រហារដោយយានដ្រូន បង្កអគ្គិភ័យ ដល់ទីតាំងស្តុកប្រេងឥន្ធនៈនៅកំពង់ផែ Sevastopol តំបន់គ្រីមៀកាលពីថ្ងៃសៅរ៍ ជាអ្វីដែលទីក្រុងមូស្គូ ចាត់ទុកជាការវាយប្រហាររបស់អ៊ុយក្រែន។ អ៊ុយក្រែន ពុំបានអះអាងទទួលខុសត្រូវចំពោះការវាយប្រហារនៅតំបន់ Sevastopol នោះទេ ស្របជាមួយការអនុវត្តន៍ស្តង់ដាររបស់ខ្លួនអំឡុងពេលជម្លោះ ដែលបានចាប់ផ្តើមកាលពីខែកុម្ភៈឆ្នាំ២០២២។
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
