​រដ្ឋអាជ្ញា​សាធារណៈ​អាល្លឺម៉ង់ និង​នគរបាល​រដ្ឋ​បាន​និយាយថា នគរបាល​អាល្លឺម៉ង់​បាន​ចាប់ខ្លួន​មនុស្ស​រាប់សិប​នាក់​នៅ​ទូទាំងប្រទេស​នៅ​ថ្ងៃ​ពុធ​នេះ ក្នុងការ​ស៊ើបអង្កេត​លើ​ក្រុម​ឧក្រិដ្ឋកម្ម​របស់​ប្រទេស​អ៊ីតាលី​ឈ្មោះថា Ndrangheta ។​

​ពួកគេ​បាន​និយាយថា យុទ្ធនាការ​បង្ក្រាប​នេះ​គឺជា​ផ្នែក​មួយ​នៃ​ការស៊ើបអង្កេត​ដែលមាន​ការសម្របសម្រួល​ធ្វើ​ដោយ​ក្រុម​អ្នកស៊ើប​អង្កេត​នៅក្នុង​ប្រទេស​អាល្លឺម៉ង់ បែ​ល​ហ្សិ​ក បារាំង អ៊ីតាលី ព័រ​ទុយ​ហ្គា​ល់ និង​អេ​ស្ប៉ា​ញ ព្រមទាំង ទីភ្នាក់ងារ​អនុវត្តន៍​ច្បាប់​របស់​សហភាព​អឺ​រុ​ប Europol និង​ទីភ្នាក់ងារ​សហភាព​អឺ​រុ​ប​បង្ក្រាប​ឧក្រិដ្ឋកម្ម Eurojust ។​

​ក្នុងចំណោម​អ្នក​ដែល​ត្រូវបាន​ចាប់ខ្លួន​នោះ​មាន​មនុស្ស ៤ នាក់​នៅ​រដ្ឋ Bavaria, ១៥ នាក់​នៅ​រដ្ឋ North Rhine-Westphalia និង ១០ នាក់​នៅ​រដ្ឋ Rhineland Palatinate​ភាគ​និរតី​របស់​អាល្លឺម៉ង់ ហើយ​នគរបាល​បាន​រឹបអូស​យក​ភ័ស្តុតាង​សំខាន់ៗ​នៅ​ទីតាំង​រាប់សិប​កន្លែង រួមទាំង​លំនៅឋាន និង​ការិយាល័យ​ផងដែរ​។​

​ក្រុម​ការិយាល័យ​រដ្ឋអាជ្ញា​នៃ​ទីក្រុង Duesseldorf, Koblenz, Saarbruecken និង​ទីក្រុង Munich បាន​និយាយ​នៅក្នុង​សេចក្តីថ្លែងការណ៍​រួមជាមួយ​នគរបាល​រដ្ឋ​នៅ​ទីក្រុង Bavaria, North Rhine-Westphalia, Rhineland Palatinate និង Saarland ថា ក្រុម​ជនសង្ស័យ​ត្រូវបាន​ចោទប្រកាន់​ពីបទ​លាង​លុយខ្មៅ គេចពន្ធ ការ​គៃបន្លំ និង​រត់ពន្ធ​គ្រឿងញៀន​។​