បាល់ទាត់៖ ក្រុមបាល់ទាត់​វិសាខាដែល​កំពុង​បោះជំរំ​ហ្វឹកហាត់ ​នៅ​ទីក្រុង​បាងកក​ប្រទេស​ថៃនឹង​បន្ដ​ធ្វើ​ការ​ប្រកួត​មិត្តភាព​កម្ដៅ​សាច់ដុំ​ នា​វេលា​ម៉ោង ៥​ល្ងាច​ថ្ងៃ​ទី​១០ ខែ​មករា ឆ្នាំ​២០១៩ នេះដោយ​ត្រូវ​ជួប​ក្រុម​សាកលវិទ្យាល័យ Rangsit University Football Club ឬ​ក្រុម RSU FC របស់​ថៃ​នៅ​កីឡដ្ឋាន Rangsit University។

​នេះ​គឺជា​ការប្រកួត​មិត្តភាព​អន្តរជាតិ​លើក​ទី​២ របស់​ក្រុម​វិសាខា ក្រៅ​ធ្វើដំណើរ​ទៅដល់​ទឹកដី​ថៃកាល​ពី​ថ្ងៃ​ទី​០៧ ខែ​មករា​កន្លងទៅ គ្រា​ដែល​ប្រកួត​ដំបូង វិសាខា បាន​យកឈ្នះ​ក្រុម​ជើង​ខ្លាំង​ម៉ាឡេស៊ី Pahang FA ដែល​ជា​អតីត​ក្រុម​ចាស់​របស់​កីឡាករ ចាន់ វឌ្ឍនាកា ៣–១។ ការប្រកួត​នេះ វិសាខា ផ្ដោត​លើ​ការ​ពង្រឹង​សមត្ថភាព និង​បង្កើន​ការ​យល់​ដឹង​ពី​ទម្រង់​លេង​ឲ្យ​បាន​ល្អ​ប្រសើរ ដើម្បី​ត្រៀម​រដូវ​កាល​ថ្មី​ខាងមុខ។​ គួរ​បញ្ជាក់​ថា ក្រុម​វិសាខា​គម្រោង​ចំណាយ​ពេល​ជិត​កន្លះ​ក្នុង​កម្មវិធី Pre-Season Tour របស់​ខ្លួន​នៅ​ប្រទេស​ថៃ​ចាប់ពី​ថ្ងៃ​ទី​០៧–១៨ ខែ​មករា​នេះដើម្បី​ហ្វឹកហាត់ និង​ធ្វើការ​ប្រកួត​មិត្តភាព​កម្ដៅ​សាច់ដុំ​មួយ​ចំនួន ជាក់ស្ដែង​ក្រោយ​ជួប​ក្រុម​ម្ចាស់ផ្ទះ Rangsit University Football Club ល្ងាច​នេះ ពួកគេ​អាច​នឹង​មាន​ជំនួប​មិត្តភាព ២​ប្រកួត​ទៀត មុន​ធ្វើដំណើរ​ត្រឡប់​មក​កម្ពុជា​វិញ៕

អត្ថបទ៖ លី ឈុន​ឡា