ភ្នំពេញ៖ សាលារាជធានីភ្នំពេញបានសម្រេចដាក់ចេញវិធានការរដ្ឋបាលសម្រាប់បង្ការការឆ្លងរីករាលដាលនៃមេរោគកូវីដ-១៩ ដែលចាប់ផ្ដើមអនុវត្តចាប់ពីថ្ងៃស្អែកនេះតទៅ បន្ទាប់ពីវិធានការបិទខ្ទប់ផុតកំណត់នៅត្រឹមយប់នេះ។
ភូមិសាស្ត្ររាជធានីភ្នំពេញ និងក្រុងតាខ្មៅរបស់ខេត្តកណ្ដាល ត្រូវបានដាក់ឱ្យស្ថិតក្រោមវិធានការបិទខ្ទប់រយៈពេល ៣សប្ដាហ៍មកហើយ នៅក្នុងកិច្ចខិតខំប្រឹងប្រែងរបស់អាជ្ញាធរដើម្បីទប់ស្កាត់ការឆ្លងរីករាលដាលនៃមេរោគកូវីដ-១៩ ដែលរាជធានីភ្នំពេញមើលកំណើននៃការឆ្លងយ៉ាងច្រើន។
ក្នុងវិធានការថ្មីដែលចេញនៅល្ងាចនេះ សាលារាជធានីភ្នំពេញបានសម្រេចកំណត់ភូមិសាស្ត្រនានាជា«តំបន់ក្រហម» ដែលជាតំបន់ប្រឈមមុខនឹងការឆ្លងរីករាលធ្ងន់ធ្ងរ បន្ទាប់មកគឺ«តំបន់លឿងទុំ» ដែលសំដៅដល់តំបន់ប្រឈមមុខនឹងការឆ្លងរីករាលដាលកម្រិតមធ្យម និង«តំបន់លឿង» ដែលសំដៅដល់តំបន់ប្រឈមមុខនឹងការឆ្លងរាលដាលកម្រិតស្រាល។
បើតាមវិធានការថ្មីនេះ ភូមិជាច្រើននៅក្នុងខណ្ឌទួលគោក ខណ្ឌមានជ័យ ខណ្ឌពោធិ៍សែនជ័យ ខណ្ឌឫស្សីកែវ ខណ្ឌ៧មករា និងខណ្ឌច្បារអំពៅ ត្រូវបានដាក់ជា«តំបន់ក្រហម» ដែលស្ថិតក្រោមវិធានការបិទខ្ទប់ដដែល។
វិធានការថ្មីនេះ បានសម្រេចឱ្យអនុវត្តវិធានការបិទខ្ទប់យ៉ាងតឹងរឹងដដែលនៅ«តំបន់ក្រហម»ដូចជា ហាមឃាត់ការធ្វើដំណើរចេញ-ចូល ហាមឃាត់សកម្មភាពអាជីវកម្ម មុខរបរ ឬសកម្មភាពការងារ និងហាមឃាត់ការជួបជុំ ឬការប្រមូលផ្ដុំមនុស្ស។
ចំណែកឯខណ្ឌព្រែកព្នៅ ខណ្ឌជ្រោយចង្វារ ខណ្ឌសែនសុខ ខណ្ឌដង្កោ ខណ្ឌដូនពេញ និងខណ្ឌចំការមន គ្មានភូមិណាមួយក្នុងខណ្ឌទាំងនេះ ត្រូវបានដាក់ឱ្យ«តំបន់ក្រហម»នោះឡើយ ប៉ុន្តែ ស្ថិតក្នុង«តំបន់លឿងទុំ» ឬ«តំបន់លឿង»៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
