លោក Donald Trump បានហៅការអះអាងរបស់អ្នកសរសេរបទអត្ថាធិប្បាយម្នាក់ ដែលថា​លោកបានចាប់រំលោភអ្នកស្រីនៅហាងលក់​សំលៀកបំពាក់​តំបន់ Manhattan ថា​ជារឿងគួរ​ឲ្យអស់សំណើច​ និងគួរឲ្យខ្ពើមរអើមបំផុត ​ក្នុងការបំភ្លឺផ្ដល់​ភស្តុតាង​នៅក្នុងតុលាការ កាលពីថ្ងៃពុធថា ការចោទប្រកាន់នានាត្រូវបានប្រឌិតឡើង ហើយថាជាការវាយប្រហារ​មិនធ្លាប់មាន។

ក្រុមមេធាវីដើមចោទរបស់លោកស្រី E. Jean Carroll បានចាក់វីដេអូមានរយៈពេលប្រមាណ៣០នាទី នៃការសម្រង់ពីការបំភ្លឺរបស់អតីតប្រធានាធិបតី រូបនេះ រួមទាំងការច្រានចោលយ៉ាងដាច់ណាត់​នៃការចោទប្រកាន់របស់អ្នកសរសេរបទអត្ថាធិប្បាយផ្តល់ដំបូន្មាន ដែលលោកបានបំពាន​លើអ្នកស្រីកាលពីពាក់កណ្ដាលទសវត្សរ៍ឆ្នាំ ១៩៩០ នៅក្នុងបន្ទប់ប្ដូរ​សំលៀកបំពាក់​ក្នុងហាង Bergdorf Goodman។

លោក Trump បាននិយាយថា ប្រសិនបើរឿងនេះ ​បានកើតឡើងមែន ប្រាកដជានឹងត្រូវបាន​រាយការណ៍​ក្នុងពេលប៉ុន្មាននាទីនោះមិនខាន ​ដោយលើកឡើងថា ​ អ្នកទិញ និងបុគ្គលិកក្នុងហាង​ជាច្រើនដែលកំពុងមមាញឹកក្នុងហាងនោះ​ ប្រាកដជាលឺសំឡេង​ប្រតាយប្រតប់គ្នា​ និង ដឹង​ដល់ក្រុមអាជ្ញាធរមិនខាន។

លោក Trump បាននិយាយនៅក្នុងការផ្ដល់សក្ខីកម្មតាមវីដេអូកាលពីខែតុលាថា វាជារឿងគួរ​ឲ្យអស់សំណើច ​និងខ្ពើមរអើមបំផុត ។នេះគ្រាន់តែជាការរៀបចំឆាក​ល្ខោនប៉ុណ្ណោះ។

ក្រុមចៅក្រមមួយចំនួនកំពុងមើលវីដេអូនោះដោយពុំ​បានបញ្ចេញមតិឡើយ​ ខណៈវីដេអូននេះ ត្រូវបាន​ចាក់នៅតាមមូនីទ័ររៀងៗខ្លួន​នៅខាងមុខកៅអីរបស់ពួកគេ៕