ភ្នំពេញ៖ នៅថ្ងៃទី៤ ខែឧសភានេះ ប្រតិភូកីឡា ក្រុមកីឡាករ កីឡាការិនី និងបណ្តាអ្នកសារព័ត៌មានបណ្តាប្រទេសអាស៊ាន ប្រមាណជិត ១០០០នាក់ បានបន្តចូលមកកម្ពុជា តាមច្រកទ្វារអាកាសយានដ្ឋានអន្តរជាតិភ្នំពេញ ​ដើម្បីចូលរួមព្រឹត្តិការណ៍ប្រកួតកីឡា SEA GAMES លើកទី៣២ ដែលកម្ពុជា ធ្វើជាម្ចាស់រៀបចំ។

បណ្តាប្រតិភូកីឡា និងអ្នកសារព័ត៌មាន ថ្លែងថា នេះជាលើកដំបូង ដែលយើងបានមកដល់​ប្រទេស​កម្ពុជា ខណៈឆ្នាំនេះ ក៏ជាឆ្នាំដំបូងដែរ ដែលកម្ពុជា បានរៀបចំព្រឹត្តិការណ៍ប្រកួតកីឡា ​SEA GAMES និងអាស៊ានប៉ារ៉ាហ្គេម ​ហើយមានការរៀបចំល្អ ​ហើយនឹងមានព័ត៌មានរឿងរ៉ាវល្អជាច្រើន ដែលមាន​ភាពទាក់ទាញ និងគេត្រូវតាមដាន។

នៅថ្ងៃនេះដែរគ្រប់អ្នកដំណើរអន្តរជាតិ ​ដែលមកដល់អាកាសយានដ្ឋានអន្តរជាតិភ្នំពេញ គឺភាគច្រើន​ជាភ្ញៀវមកទស្សនាព្រឹត្តិការណ៍បើកប្រកួតកីឡា ​SEA GAMES លើកទី៣២ និងមកទស្សនាផ្ទាល់ទឹកចិត្តកីឡាករកីឡាការិនី​ ប្រកួតកីឡាSEA GAMES នៅតាមវិញ្ញាសាកីឡាផ្សេងៗ។

បើតាមឧត្តមសេនីយឯក ដោក សុផា ក្នុងនាមអនុប្រធានក្រុមការងារបដិសណ្ឋារកិច្ច ប្រចាំអាកាស​យានដ្ឋាន​អន្តរជាតិភ្នំពេញ បានឲ្យដឹងថា ​ចាប់តាំងពីថ្ងៃទី២៤ ​ខែមេសា ​រហូតមកដល់ថ្ងៃទី៤ ខែឧសភានេះ ​មានថ្នាក់ដឹកនាំ ប្រតិភូកីឡា គ្រូបង្វឹក និងក្រុមអត្តពលិកមកពីបណ្តាប្រទេសអាស៊ាន បានមកដល់កម្ពុជា ​មានប្រមាណជាង​៤០០០នាក់ ​ហើយប្រតិភូកីឡានឹងបន្តធ្វើដំណើរ​មកកម្ពុជា​បន្តបន្ទាប់​ទៀតរហូតដល់ថ្ងៃទី១០ ​ខែឧសភាទើបអស់៕ អត្ថបទ ស៊ុម សុខជា