ភ្នំពេញ ៖ ប្រធានអង្គការអន្តរជាតិទេសន្តរប្រវេសន៍ (International Organization for Migration-IOM) ប្រចាំ​តំបន់អាស៊ី-ប៉ាស៊ីហ្វិក បានថ្លែងអំណរគុណកម្ពុជា បានគាំទ្រដល់បេសកកម្ម និងដើម្បីចូលរួមចំណែក​ក្នុងការ​គ្របដណ្តបសេវាសុខភាពជាសកល។

​ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានអនុញ្ញាតឱ្យលោកស្រី Sarah Lou - Arriola ប្រធានអង្គការអន្តរជាតិទេសន្តរប្រវេសន៍ (International Organization for Migration-IOM) ប្រចាំតំបន់អាស៊ី-ប៉ាស៊ីហ្វិក ចូលជួបសវនាការ និងសម្ដែងការគួរសមក្នុងឱកាសដែលលោកស្រី ត្រូវបានតែងតាំង​ជាប្រធានអង្គការ IOM ថ្មីប្រចាំតំបន់, នារសៀលថ្ងៃទី៣ ខែឧសភា ឆ្នាំ២០២៣ នៅទីសី្តការក្រសួង។

ជាកិច្ចចាប់ផ្ដើម ឯកឧត្តមរដ្ឋមន្ត្រីក្រសួងសុខាភិបាល បានសម្ដែងមនោសញ្ចេតនាស្វាគមន៍យ៉ាងកក់ក្តៅ ចំពោះ​លោកស្រីប្រធានអង្គការអន្តរជាតិទេសន្តរប្រវេសន៍ប្រចាំតំបន់អាស៊ី-ប៉ាស៊ីហ្វិក និងថ្លែងអំណរគុណចំពោះអង្គការ IOM ដែលបានសហការ និងគាំទ្រវិស័យសុខាភិបាល ជាពិសេសក្នុងអំឡុងពេល នៃការរីករាលដាលជំងឺកូវីដ-១៩។

ជាមួយគ្នានោះដែរ លោកស្រីប្រធានអង្គការ IOM ប្រចាំតំបន់ បានថ្លែងអបអរសាទរ និងកោតសរសើររាជរដ្ឋាភិបាល​កម្ពុជា ក្នុងកិច្ចខិតខំប្រឹងប្រែងគ្រប់គ្រង ទប់ស្កាត់ ការរីករាលដាលជំងឺកូវីដ-១៩ នៅកម្ពុជា ក្នុងរយៈពេលជាង២ឆ្នាំ​កន្លងមកនេះបានទទួលជោគជ័យ ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិត​របស់​សម្ដេចអគ្គមហាសេនាបតី​តេជោ​ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាអគ្គមេបញ្ជាការដឹកនាំ ចង្អុលបង្ហាញផ្ទាល់ ដែលអាចឱ្យកម្ពុជា បើកដំណើរការប្រទេសទាំងសកម្មភាពសេដ្ឋកិច្ច និងសង្គមឡើងវិញ​តាំងពីខែវិច្ឆិកា ឆ្នាំ២០២១។

លោកស្រីប្រធានអង្គការ IOM ក៏បានថ្លែងអំណរគុណដល់ក្រសួងសុខាភិបាល ដែលបានសហការគាំទ្រដល់​បេសកកម្មរបស់អង្គការ IOM សម្រេចបានសមិទ្ធផលមួយចំនួនដូចខាងក្រោម ជាពិសេសដើម្បីចូលរួមចំណែក​ក្នុងការសម្រេចបានការគ្របដណ្ដបសេវាសុខភាព ជាសកល៖ បានបង្កើតគោលនយោបាយជាតិ ស្តីពីសុខភាពជន​ទេសន្តរប្រវេសន៍ កាលពីខែមករា ឆ្នាំ២០២១ បានបង្កើត និងដាក់ឲ្យអនុវត្តផែនការយុទ្ធសាស្ត្រជាតិ ស្តីពីសុខភាព​ជនទេសន្តរប្រវេសន៍ឆ្នាំ២០២២-២០៣០ កាលពីចុងខែធ្នូ ឆ្នាំ២០២២ និងគាំទ្រដល់ដំណើរការ​ក្រុមការងារបច្ចេកទេស​សុខភាពជនទេសន្តរប្រវេសន៍នៅថ្នាក់ជាតិ និងថ្នាក់ក្រោមជាតិ។

ជាការឆ្លើយតប ឯកឧត្តមរដ្ឋមន្ត្រី ក៏បានលើកទឹកចិត្តអង្គការ IOM សហការឱ្យបានជិតស្និទ្ធិជាមួយក្រសួង ស្ថាប័នពាក់ព័ន្ធ និងដៃគូ ដើម្បីអនុវត្តគោលនយោបាយ និងផែនការយុទ្ធសាស្ត្រជាតិ ស្តីពីសុខភាពជន​ទេសន្តរប្រវេសន៍ នេះឱ្យទទួលបានជោគជ័យ។

ជាទីបញ្ចប់ ឯកឧត្តមរដ្ឋមន្ត្រី ក៏បានសម្តែងអំណរគុណយ៉ាងជ្រាលជ្រៅជាថ្មីម្តងទៀត ចំពោះការជួយឧបត្ថម្ភគាំទ្រ របស់អង្គការ IOM ក្នុងស្មារតីសាមគ្គីភាព មិត្តភាព និងកិច្ចសហប្រតិបត្តិការ រវាងក្រសួងសុខាភិបាល និងអង្គការ IOM និង បានជូនពរប្រធានអង្គការ IOM ប្រចាំតំបន់បានទទួលជោគជ័យក្នុងបេសកកម្ម៕ ដោយ ៖ រដ្ឋា