មនុស្សរាប់ពាន់នាក់ បានប្រមូលផ្តុំគ្នានៅទីក្រុង Budapest កាលពីថ្ងៃពុធ (៣ ឧសភា) ដើម្បីតវ៉ាប្រឆាំងនឹងច្បាប់ថ្មីគាំទ្រដោយរដ្ឋាភិបាលដែលនឹងលុបបំបាត់ឋានៈជាមន្ត្រីរាជការរបស់គ្រូបង្រៀន និងបង្កើនបន្ទុកកាន់តែធ្ងន់សម្រាប់ការងាររបស់ពួកគេ។
ក្រុមគ្រូបង្រៀនជិត ៥.០០០នាក់ បាននិយាយរួចមកហើយថា ពួកគេនឹងចាកចេញពីការងាររបស់ខ្លួន ប្រសិនបើច្បាប់ស្តីពីឋានៈនេះចូលជាធរមាន ប៉ុន្តែរដ្ឋាភិបាលរបស់លោកនាយករដ្ឋមន្ត្រី Viktor Orban កំពុងបន្តដំណើរទៅមុខតាមរយៈកំណែទម្រង់មួយចំនួន ដែលនឹងដកចេញនូវផ្នែកខ្លះនៃសន្តិសុខការងាររបស់គ្រូបង្រៀន។
យោងតាមពង្រាងចាស់នៃច្បាប់នេះ បានចែងថា អាកប្បកិរិយាព្រមទាំងទំនាក់ទំនងរបស់គ្រូបង្រៀននឹងត្រូវបានត្រួតពិនិត្យដោយមធ្យោបាយបច្ចេកទេស។ បើទោះជារដ្ឋាភិបាលបានសន្យាថានឹងដកបញ្ហានេះ និងបទប្បញ្ញត្តិតូចៗផ្សេងទៀតចេញពីពង្រាងច្បាប់នេះក៏ដោយ ក៏ការចរចានៅតែបន្តរវាងរដ្ឋាភិបាល និងក្រុមសហជីពរបស់គ្រូបង្រៀន។
ប្រសិនបើច្បាប់នេះ ត្រូវបានអនុម័តក្នុងទម្រង់បច្ចុប្បន្នរបស់ខ្លួននោះ ចាប់ពីថ្ងៃទី១ខែមិថុនា ម៉ោងធ្វើការប្រចាំថ្ងៃអតិបរមារបស់គ្រូបង្រៀននឹងកើនឡើងពី ៨ ទៅ ១២ ម៉ោង ហើយម៉ោងធ្វើការប្រចាំសប្តាហ៍ពី ៤០ ទៅ ៤៨ ម៉ោង និងចំនួនម៉ោងនៃការបង្រៀនជំនួសគឺចាប់ពី ៣០ ទៅ ៨០ ម៉ោងក្នុងមួយឆ្នាំ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
