ភ្នំពេញ ៖ ឯកឧត្តម សោម សុគន្ធ រដ្ឋលេខាធិការប្រចាំការ តំណាងលោកជំទាវ បណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ បានទទួលជួបឯកឧត្តម NGUYEM VAN HUNG រដ្ឋមន្រី្តក្រសួងវប្បធម៌ កីឡា និងទេសចរណ៍ នៃសាធារណរដ្ឋសង្គមនិយមវៀតណាម ដើម្បីសម្តែងការគួរម និងពិភាក្សាការងារស្តីពីគម្រោងរៀបចំសប្តាហ៍វប្បធម៌រវាងប្រទេសទាំងពីរ ឆ្នាំ២០២៣ នារសៀលថ្ងៃទី៤ ខែឧសភានេះ។

​ជាកិច្ចចាប់ផ្តើម ឯកឧត្តម សោម សុគន្ធ បានសម្ដែងមនោសញ្ចេតនាស្វាគមន៍យ៉ាងកក់ក្តៅចំពោះ ឯកឧត្តម NGUYEM VAN HUNG និងថ្លែងអំណរគុណចំពោះក្រសួងវប្បធម៌ កីឡា និងទេសចរណ៍ នៃសាធារណរដ្ឋសង្គមនិយមវៀតណាម ដែលបានសហការគាំទ្រវិស័យវប្បធម៌ ជាពិសេសក្នុងអំឡុងពេល នៃការរីករាលដាលជំងឺកូវីដ-១៩។ ទន្ទឹមនឹងនោះក្រសួង នៃទាំងពីរ មានកិច្ចព្រមព្រៀងលើវិស័យវប្បធម៌ ក្នុងនោះទិវាវប្បធម៌ កម្ពុជា-វៀតណា, វៀតណាម-កម្ពុជា ជាព្រឹតិ្តការណ៍វប្បធម៌ ដើម្បីផ្តល់ឱកាសជូនប្រជាជន នៃប្រទេសទាំងពីរ ក្នុងការស្វែង​យល់ពីគ្នា​ទៅវិញទៅមក និងរួមចំណែកក្នុងការនាំយកការផ្សារភ្ជាប់ និងកិច្ចសហប្រតិបតិ្តការមិត្តភាព និងបងប្អូន ភូមិផងរបងជាមួយគ្នារវាងប្រជាជន និងប្រជាជន​នៃប្រទេសទាំងពីរ ដែលជាផ្នែកមួយ​នៃសកម្មភាពអបអរសាទរខួបលើកទី៥៥ នៃការបង្កើតទំនាក់ទំនងការទូតផ្លូវការ និងឆ្នាំមិត្តភាពកម្ពុជា-វៀតណាម ឆ្នាំ២០២៣។

ក្នុងជំនួបពិភាក្សាការងារខាងលើនេះ ភាគីទាំងពីរ បានប្តេជ្ញាបន្តកិច្ចសហប្រតិបត្តិការណ៍លើផ្នែកវប្បធម៌ឲ្យកាន់តែប្រសើរឡើងបន្ថែមទៀត ជាពិសេសឯកឧត្តម សោម សុគន្ធ ក៏បានសំណូមពរដល់ភាគីវៀតណាម បន្តជួយបណ្តុះបណ្តាលធនធានមនុស្ស មួយចំនួនដែលភាគីវៀតណាមអាចជួយទៅបានលើវិស័យវប្បធម៌។

ជាការឆ្លើយតប ឯកឧត្តម NGUYEM VAN HUNG បានអញ្ជើញថ្នាក់ដឹកនាំក្រសួងវប្បធម៌ កម្ពុជា ចូលរួមអបអរសាទរខួបលើកទី២០ នៃការបញ្ចូលទីក្រុងវេ ជាសម្បតិ្តបេតិកភណ្ឌពិភពលោក នាពេលខាងមុខនេះ៕ អត្ថបទ ៖ រដ្ឋា​