កងកម្លាំងទ័ពអាកាសរបស់អ៊ុយក្រែន បានបាញ់ទម្លាក់យានដ្រូនមួយគ្រឿងក្នុងចំណោមយានដ្រូនជាច្រើនរបស់ខ្លួន ដែលកងកម្លាំងនេះនិយាយថា បានបាត់បង់ការគ្រប់គ្រង នៅខាងលើទីក្រុងគីវ។

មានការផ្ទុះជាច្រើនក្នុងរយៈពេល១៥ទៅ២០នាទី កាលពីល្ងាចថ្ងៃព្រហស្បតិ៍ ខណៈការការពារដែនអាកាស មានបំណងបាញ់ទម្លាក់យានដ្រូននេះ នៅក្នុងតំបន់មួយ នៅជិតការិយាល័យប្រធានាធិបតី។

នាយសេនាធិការប្រធានាធិបតីអ៊ុយក្រែនលោក Andriy Yermak កាលពីពេលដំបូង បាននិយាយថា វាជាយានដ្រូនរបស់សត្រូវ ដែលត្រូវបានបាញ់ទម្លាក់។ ប៉ុន្តែក្រោយមកកងកម្លាំងទ័ពអាកាស បានសារភាពថា វាជារបស់អ៊ុយក្រែន ហើយត្រូវបានបំផ្លាញដើម្បីបញ្ចៀស​កាលៈទេសៈផលវិបាកដែលមិនគួឲ្យកើតឡើង។

នៅក្នុងសេចក្តីថ្លែងការណ៍ កងទ័ពអាកាសនិយាយថា យានដ្រូន Bayraktar TB2 UAV បានបាត់បង់ការគ្រប់គ្រងនៅអំឡុងម៉ោងប្រហែល២០:០០នាទី ម៉ោងក្នុងតំបន់ នៅតំបន់ទីក្រុងគីវ អំឡុងការហោះហើរតាមកាលកំណត់។

កងទ័ពអាកាសបាននិយាយបន្ថែមថា ខ្លួនបានសម្រេចចិត្តបាញ់ទម្លាក់យានដ្រូន ចាប់តាំងពីវត្តមានរបស់យាន UAVs ពុំអាចគ្រប់គ្រងបាននៅលើអាកាសក្នុងរដ្ឋធានី ដែលអាចនាំទៅរកផលវិបាកមិនគួឲ្យកើតឡើង។ កងទ័ពអាកាសនិយាយថា ពុំមានការស្លាប់ឬរងរបួសនោះទេពីការបាញ់ទម្លាក់យានដ្រូននេះ។

សេចក្តីថ្លែងការណ៍និយាយថា វាគួឲ្យសោកស្តាយ ប៉ុន្តែនេះជាបច្ចេកវិទ្យា ហើយករណីបែបនេះបានកើតឡើង។ វាប្រហែលជាកំហុសបច្ចេកវិទ្យាដែលហេតុផល​ជាច្រើនកំពុងត្រូវបានបង្កើតឡើង។

វីដេអូជាច្រើន នៃកិច្ចប្រឹងប្រែងបាញ់ទម្លាក់យានដ្រូន ត្រូវបានចែករំលែកយ៉ាងទូលំទូលាយនៅលើបណ្តាញផ្សព្វផ្សាយសង្គម ហើយសំឡេងអបអរត្រូវបានលាន់ឮ នៅពេលចុងក្រោយដែលយានដ្រូនត្រូវបានបាញ់ទម្លាក់។