មន្ត្រីផ្តល់ជំនួយសហរដ្ឋអាមេរិក ជាន់ខ្ពស់ម្នាក់ បានព្រមានថា ប្រជាជនអាហ្វហ្គានីស្ថានកំពុងស្ថិតនៅក្នុងឆ្នាំដ៏ពិបាកនៅខាងមុខ ខណៈម្ចាស់ជំនួយរកមធ្យោបាយដោះស្រាយភាពប្រឈមចំពោះការបង្ក្រាបរបស់រដ្ឋបាលក្រុមតាលីបង់ទៅលើស្ត្រីនិងក្មេងស្រី វិបត្តិកាន់តែច្រើននៅជុំវិញពិភពលោក និងការផ្តល់មូលនិធិកាន់តែតិចគ្រប់យ៉ាងទាំងអស់។

ក្រុមតាលីបង់ បានដណ្តើមអំណាច កាលពីខែសីហា ឆ្នាំ២០២១ ខណៈកងកម្លាំងដឹកនាំដោយសហរដ្ឋអាមេរិក បានដកខ្លួនចេញ បន្ទាប់ពីរយៈពេល២០ឆ្នាំនៃសង្គ្រាម។ កាលពីខែមុន ក្រុមតាលីបង់បញ្ជាដាក់បម្រាមលើស្ត្រីអាហ្វហ្គានីស្ថានមិនឲ្យបម្រើការឲ្យអង្គការសហប្រជាជាតិ បន្ទាប់ពីបញ្ឈប់ស្ត្រីភាគច្រើនមិនឲ្យបម្រើការឲ្យក្រុមផ្តល់ជំនួយកាលពីខែធ្នូ។

លោកស្រី Samantha Power ប្រធានរដ្ឋបាល របស់ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) បានប្រាប់សារព័ត៌មានរ៉យទ័រថា យើងមិនដែលធ្វេសប្រហែសចំពោះបញ្ហានេះទេ ព្រោះតែជាការគួឲ្យអាណិត និងពុំអាចនៅស្ងៀមបាន។

លោកស្រី និយាយថា យើងនឹងរំពឹងទុកពីឆ្នំាដ៏លំបាកខ្លាំងនៅចំពោះមុខសម្រាប់ប្រជាជន​អាហ្វហ្គានីស្ថាន ​ដោយកត់សំគាល់ថា នៅក្នុងឆ្នាំ២០២២ ទីភ្នាក់ងារសហរដ្ឋអាមេរិក​សម្រាប់ការ​អភិវឌ្ឍ​អន្តរជាតិ (USAID) មានថវិកាច្រើន ដើម្បីឆ្លើយតបចំពោះផលប៉ះពាល់ជាបន្តបន្ទាប់​នៃសង្គ្រាម​របស់រុស្ស៊ី លើអ៊ុយក្រែន ដែលអង្គការសហប្រជាជាតិ បានដាក់កំហុស​សម្រាប់ភាពកាន់​តែធ្ងន់ធ្ងរនៃវិបត្តិស្បៀងអាហារសកល។

លោកស្រី និយាយថា ទីក្រុងវ៉ាស៊ីនតោន នឹងត្រូវបង្កើតជម្រើដ៏លំបាកមួយចំនួននៅឆ្នាំនេះ​លើជំនួយ​មនុស្សធម៌សកល។

អង្គការសហប្រជាជាតិ នឹងស្ថិតនៅក្នុងប្រទេសអាហ្វហ្គានីស្ថាន ដើម្បីព្យាយាមជួយមនុស្សរាប់​លាននាក់​ដែលកំពុងត្រូវការជំនួយ ដែលអគ្គលេខាធិការអង្គការ​សហប្រជាជាតិ លោក Antonio Guterres បានសន្យាកាលពីថ្ងៃអង្គារ ប៉ុន្តែលោកបាននិយាយថាមូលនិធិជិតអស់ទៅហើយ ដោយ​មូលនិធិ៤,៦ ពាន់លានដុល្លារ ដែលអង្គការសហប្រជាជាតិ អំពាវនាវរក ទទួលបានតិចជាង ៧ភាគរយ៕