​

​ក្រុម​សមាជិក​សាសនា​ជីវិត​ថ្មី រាប់សិប​នាក់​បាន​អបអរសាទរ និង​ច្រៀង​ចម្រៀង ខណៈ​គ្រូ​គង្វាល​សាសនា​របស់​ពួកគេ លោក Ezekiel Odero ត្រូវបាន​តុលាការ​ប្រទេស​កេ​ន​យ៉ា​ដោះលែង​កាលពី​ថ្ងៃ​ព្រហស្បតិ៍ (៤ ឧសភា​)​។ គ្រូ​គង្វាល​សាសនា​រូបនេះ ត្រូវបាន​ឃុំខ្លួន​កាលពី​សប្តាហ៍​មុន ជា​ផ្នែក​មួយ​នៃ​ការស៊ើបអង្កេត​លើ​ករណី​ស្លាប់​មនុស្ស​រាប់សិប​នាក់ ដែល​នគរបាល​និយាយថា បាន​បង្អត់អាហារ​ខ្លួនឯង​រហូតដល់​ស្លាប់​តាម​ការណែនាំ​របស់​មេដឹកនាំ​សាសនា​។​

​រដ្ឋមន្ត្រី​ក្រសួងមហាផ្ទៃ​ប្រទេស​កេ​ន​យ៉ា បាន​ចោទប្រកាន់​គ្រូ​គង្វាល​សាសនា លោក​Ezekiel Odero បន្ទាប់ពី​ត្រូវបាន​ចាប់ខ្លួន កាលពី​ថ្ងៃ​ព្រហស្បតិ៍​សប្តាហ៍​មុន (២៧ មេសា​) ពីបទ​ជាប់​ពាក់ព័ន្ធ​ក្នុងករណី "​ស្លាប់​រង្គាល​នៃ​ក្រុម​សាវ័ក​របស់ខ្លួន​" ដោយ​មិនបាន​បញ្ជាក់​លម្អិត​ពី​មូលហេតុ​ទេ​។ មេធាវី​ការពារ​ក្តី​លោក Cliff Ombeta បាន​បដិសេធ​ការចោទប្រកាន់​របស់រ​ដ្ឋ ហើយ​បានទាមទារ​ឲ្យ​មានការ​ដោះលែង​លោក Odero ។​

​លោក Omido បាន​ជំរុញ​ឲ្យ​មានការ​ដោះលែង​លោក Odero ដោយ​ជោគជ័យ ហើយ​បាន​បញ្ជា​ឱ្យ​លោក Odero ដាក់​ទ្រព្យ​តម្កល់​ធានា​មិនមែន​សាច់ប្រាក់​មានតម្លៃ​ចំនួន​៣​លាន​ស៊ី​លីង​រូ​ប័​យ​បណ្ណ​កេ​ន​យ៉ា (២២.០០០​ដុល្លារ​) ឬ​ជំនួស​មកវិញ​ដោយ​បង់​សាច់ប្រាក់​ធានា​ចំនួន ១,៥ លាន​ស៊ី​លីង ។ នៅ​ខាងក្រៅ​តុលាការ ក្រុម​សាវ័ក​របស់លោក​ជាង ១០០ នាក់​បាន​ច្រៀង​សរសើរ និង​អបអរសាទរ​ការសម្រេច​របស់​តុលាការ​៕​