​ក្រុម​អាជ្ញាធរ​បាន​និយាយថា វាំងនន​បង្អួច​ត្រូវបាន​គេ​ឃើញ​យោល​យោគ​ចុះឡើង​ក្នុងអំឡុងពេល​រញ្ជួយ​ដី​កម្រិត ៦,៣រ៉ិ​កទ័រ ដែល​បាន​វាយប្រហារ​ប្រទេស​ជប៉ុន​នៅ​ថ្ងៃ​សុក្រ (៥ ឧសភា​)​នេះ ទោះបីជា​គ្មាន​ការព្រមាន​អំពី​រលក​យក្ស​ស៊ូណាមិ​បន្ទាប់ពី​ការរញ្ជួយ​ដី​នេះ​ក៏ដោយ​។​

​វីដេអូ​ដែល​បាន​បង្ហោះ​នៅលើ​ប្រព័ន្ធ​ផ្សព្វផ្សាយ​សង្គម បានបង្ហាញ​ពី​វាំងនន​បង្អួច​នៃ​អគារ​មួយ​នៅក្នុង​ទីក្រុង Ichikawa ខេត្ត Chiba ដៃ​ល​យោល​យោគ​ខ្លាំង ​អំឡុងពេល​រញ្ជួយ​ដី​ដែល​បាន​វាយប្រហារ​លើ​ខេត្ត Ishikawa ភាគ​ខាងលិច​របស់​ប្រទេស​ជប៉ុន​។​

​រដ្ឋមន្ត្រី​ទទួលបន្ទុក​ទីស្ដីការគណៈរដ្ឋមន្ត្រី​លោក Hirokazu Matsuno បាន​និយាយថា រដ្ឋាភិបាល​បាន​បង្កើត​ការិយាល័យ​ទប់ទល់​គ្រោះមហន្តរាយ​នៅក្នុង​មជ្ឈមណ្ឌល​គ្រប់គ្រង​វិបត្តិ​ដែល​ដឹកនាំ​ដោយ​នាយករដ្ឋមន្ត្រី ដើម្បី​ឆ្លើយតប​ទៅនឹង​ការរញ្ជួយ​ដី​។​

​លោក Matsuno បាន​និយាយថា គ្មាន​ភាពមិនប្រក្រតី​ណាមួយ​ត្រូវបាន​គេ​រាយការណ៍​នៅ​រោងចក្រ​ថាមពលនុយក្លេអ៊ែរ Shika ដែលមាន​ទីតាំងនៅ​ខេត្ត Ishikawa ក៏ដូចជា​នៅ​រោងចក្រ​ថាមពលនុយក្លេអ៊ែរ Kashiwazaki-Kariwa ក្នុង​ខេត្ត​ជិតខាង Niigata នោះទេ​៕​