យ៉ាងហោចណាស់មនុស្ស២០០នាក់ បានស្លាប់ក្នុងទឹកជំនន់ដ៏គំហុក នៅសាធារណៈរដ្ឋប្រជាធិបតេយ្យកុងហ្គោភាគខាងកើត កាលពីថ្ងៃសុក្រទី៥ ខែឧសភា បន្ទាប់ពីភ្លៀងធ្លាក់ខ្លាំង បានបំផ្លាញ​អគារជាច្រើន ​និងបានបង្ខំឲ្យបុគ្គលិកផ្តល់​ជំនួយមក​ប្រមូលសាកសព ដែលគ្រប់ដណ្តប់ដោយដីល្បាប់ដាក់ជាគំនរ។

បុគ្គលិកកាកបាទក្រហមក្នុង​សំលៀកបំពាក់​ពណ៌ខៀវ បានលាងសម្អាតសាកសពដាក់លើគ្នា ដែលសាកសពមួយចំនួនបានបាត់បង់​សំលៀកបំពាក់ និងបានគ្របដណ្តប់ដោយដី។

ភ្លៀងធ្លាក់នៅក្នុងតំបន់ Kalehe នៅខេត្តKivu ខាងត្បូង បានបណ្តាលឲ្យទន្លេមានទឹក​ហៀរលេចច្រាំង​កាលពីថ្ងៃព្រហស្បតិ៍ដែលបានជន់លិចភូមិ Bushushu និងភូមិ Nyamukubi ។ សមាជិកសង្គមស៊ីវិលក្នុងតំបន់ លោក Kasole Martin បាននិយាយថា សាកសព ២២៧នាក់ ត្រូវបានរកឃើញ។

លោក Martin និយាយថា មនុស្សជាច្រើនកំពុងទទួលដំណេកនៅកណ្តាលវាល ហើយសាលារៀន និងមន្ទីរពេទ្យ ត្រូវបានទឹកហូរកូចនាំទៅ។ អ្នកនៅរស់រាប់សិបនាក់ កំពុងត្រូវបានព្យាបាល នៅក្នុងមន្ទីរពេទ្យក្នុងតំបន់មួយកន្លែង បន្ទាប់ពីទទួលរងរបួសអំឡុងទឹកជំនន់។

វេជ្ជបណ្ឌិតលោក Norbert Walangulu នៅមន្ទីរពេទ្យធំក្នុងតំបន់ Kalehe បាននិយាយថា ពួកគេពុំមានថ្នាំពេទ្យ និងបរិក្ខារគ្រប់គ្រាប់ ដើម្បីព្យាបាលអ្នករបួសឲ្យបានសមរម្យនោះទេ។

វាពុំមែនជាលើកទី១នោះទេ ដែលពលរដ្ឋជាច្រើន បានបាត់បង់មនុស្សជាទីស្រលាញ់​និង​ទ្រព្យសម្បត្តិ​នៅទីនេះដោយសារតែភ្លៀងធ្លាក់ខ្លាំង។ ​ទឹកជំនន់និងបំណាក់ដី គឺជារឿងសមញ្ញ នៅខេត្ត Kivu ខាងត្បូង។

យោងតាមអង្គកាសហប្រជាជាតិ បានឲ្យដឹងថា ឧបត្តិហេតុទ្រង់ទ្រាយស្រដៀងគ្នានេះ នៅសាធារណៈរដ្ឋកុងហ្គោ ​បានកើតឡើងកាលពីខេតុលា ឆ្នាំ២០១៤ ដែលនៅពេលនោះ​ភ្លៀងធ្លាក់ខ្លាំង បានបំផ្លាញលំនៅឋានជាង៧០០ខ្នង និងមនុស្សជាង១៣០នាក់ត្រូវបាន​រាយការណ៍ថាបាត់ខ្លួន។