ភ្នំពេញ៖ សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា និងជាប្រធានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ ដែលហៅកាត់ថា CAMSOC បានស្នើសុំការយោគយល់ និងស្នើជួយផ្តល់យោបល់ ក្នុងនាមជាគ្រួសារស៊ីហ្គេម ប្រសិនបើកម្ពុជាមានភាព ចន្លោះប្រហោង និងខុសឆ្គង់កន្លែងណាមួយនោះ។

នៅក្នុងពិធីបើកជាផ្លូវការនៃព្រឹត្តិការណ៍កីឡាអាស៊ីអាគ្នេយ៍លើកទី៣២ ឆ្នាំ២០២៣ នៅពហុកីឡដ្ឋាន​មរតកតេជោ នៅរាត្រីថ្ងៃទី៥ ខែឧសភា ឆ្នាំ២០២៣នេះ ​សម្តេចពិជ័យសេនា ទៀ បាញ់ បាន​បញ្ជាក់ថា កម្ពុជា​បាន​ទន្ទឹងរង់ចាំការធ្វើជាម្ចាស់ផ្ទះ ​នៃការបើកការប្រកួតកីឡាស៊ីហ្គេម​នេះអស់​រយៈពេល៦៤ឆ្នាំ​ហើយ ខណៈដែលកម្ពុជា​មាន​ឱកាសធ្វើជាម្ចាស់ផ្ទះនូវមហាព្រឹត្តិការណ៍​ដ៏​អស្ចារ្យនេះ គឺដោយសារ ​កម្ពុជាមានសុខសន្តិភាពពេញលេញ ដូច្នេះប្រសិន បើការបើកព្រឹត្តិកាណ៍​មានការខ្វះខាត ​និងមិនល្អត្រង់កន្កែងណាមួយដែលនាំឲ្យប៉ះពាល់ដល់មិត្តភ័ក្រទាំង​អស់គ្នាដែល​បាន​ចូលរួមនេះ សូមមេត្តាយោគយល់ និងអធ្យាស្រ័យ។

ជាមួយគ្នានោះដែរ សម្តេចពិជ័យសេនា ទៀ បាញ់ ក៏បានមានប្រសាសន៍ដែរថា ការធ្វើជាម្ចាស់ផ្ទះ​កីឡាអាស៊ីអាគ្នេយ៍លើកទី៣២នេះ ​មិនត្រឹមតែសំដៅលើការរៀបចំ​ព្រឹត្តិការណ៍កីឡាមួយប៉ុណ្ណោះទេ ប៉ុន្តែ បានបង្ហាញពីទស្សនីយភាព ​ជាប្រវត្តិសាស្រ្តសដ៏មានការទាក់ទាញ ​និងពីភាពអស្ចារ្យ ដែល​ជាលក្ខណៈពិសេសមួយនៃវប្បធម៌ខ្មែរ ​និងជាអត្តសញ្ញាណជាតិ ​ដើម្បីផ្សព្វផ្សាយដល់ពិភពលោក។

សម្តេចពិជ័យសេនា ​ទៀ បាញ់ ​បានលើកឡើងទៀតថា ​តាមរយៈព្រឹត្តិការណ៍ នឹងធ្វើការ​ផ្លាស់ប្តូរ​ទេសចរណ៍ សេដ្ឋកិច្ច-សង្គម​និងកិច្ចសហប្រតិបត្តិការក្នុងចំណោមបណ្តាប្រទេស​អាស៊ីអាគ្នេយ៍ ដែលបានចូលរួមបង្កើនឱកាសទំនាក់ទំនងគ្នាកាន់តែជិតស្និត និងស៊ីជម្រៅ​បន្ថែមទៀត ក្នុងការពង្រឹងវិស័យកីឡា។

សម្តេចពិជ័យសេនា បានបន្ថែមទៀតថា ប្រទេសកម្ពុជា បានយកក្តីស្រមៃរបស់ខ្លួនឲ្យក្លាយជា​ការពិត​ហើយ ខណៈប្រជាជនកម្ពុជានៅទូទាំងប្រទេស ពិតជាមានក្តីរំភើបរីករាយមិនអាចបំភ្លេចបាន​នូវព្រឹត្តិការណ៍នេះផងដែរ។

ក្នុងឱកាសនេះដែរសម្តេចពិជ័យសេនាប្រធាន CAMSOC ក៏បានលើកឡើងផងដែរថា ព្រឹត្តិការណ៍​ការ​ប្រកួតកីឡាស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះនេះគឺកម្ពុជា​បានទទួល​ប្រតិភូកីឡាចំនួន១១ប្រទេស ​ដោយមានប្រតិភូកីឡាចំនួន១០៨៩០នាក់ ខណៈពួកគេក៏ដូចជាពិភព​លោកទាំងមូលនឹងចង់ចាំដល់កម្ពុជា ដែលកម្ពុជាបើកនូវព្រឹត្តិការណ៍ដ៏អស្ចារ្យនេះមិនគិត​ថ្លៃសំបុត្រទស្សនាក្នុងពិធីបើក និងបិទ,កម្មវិធីផ្សាយរបស់ទូរទស្សន៍ទៅ​បរទេស,​ទាំងការហូបចុក,ស្នាក់នៅ និងដឹកជញ្ជូនប្រតិភូកីឡាទាំងអស់ផងដែរ ដោយកម្ពុជា​ប្រសិទ្ធនាមថា«កម្ពុជាព្រឹត្តិកាណ៍កីឡាមិនគិតថ្លៃ»៕អត្ថបទ៖ បាន ចក់