អង្គការសហប្រជាជាតិ បាននិយាយកាលពីថ្ងៃសុក្រថា ខ្លួននឹងបន្តឲ្យបុគ្គលិកអាហ្វហ្គានីស្ថានធ្វើការនៅផ្ទះ បន្ទាប់ពីរដ្ឋបាលរបស់ក្រុមតាលីបង់ បានចាប់ផ្តើមអនុវត្តបម្រាមលើស្ត្រីអាហ្វហ្គានីស្ថាន ដែលបម្រើការឲ្យស្ថាប័នពិភពលោកមួយនេះ រយៈពេល១ខែកន្លងទៅនេះ។

អង្គការសហប្រជាជាតិមានបុគ្គលិក អាហ្វហ្គានីស្ថាន ៣,៣០០នាក់ ​ដែលក្នុងចំណោមនេះ​៤០០នាក់​គឺជាស្ត្រី ខណៈបុគ្គលិកអន្តរជាតិប្រមាណ៦០០នាក់ ​នៅក្នុងប្រទេសនេះ ពុំបានរងផលប៉ះពាល់​ដោយបម្រាមនេះនោះទេ។

អង្គការនេះ បាននិយាយថា ខ្លួននឹងពិនិត្យឡើងវិញនូវប្រតិបត្តិការ និងបន្តទុកឲ្យបុគ្គលិកអាហ្វហ្គានីស្ថានស្នាក់នៅផ្ទះរហូតដល់ថ្ងៃទី៥ ខែឧសភា។

អ្នកនាំពាក្យរងអង្គការសហប្រជាជាតិ លោក Farhan Haq បានប្រាប់អ្នកសារព័ត៌មានក្នុងទីក្រុងញ៉ូវ យ៉កថាយើងកំពុងធ្វើការដើម្បីឈានដល់ការសម្រេចលើគំរូការងារសមស្រប។ កាលពីពេលមុន យើងមានការប្រឈម ព្រោះតែតម្រូវការរបស់ប្រជាជនអាហ្វហ្គានីស្ថានដ៏ធំ ហើយយើងមានបំណង​បំពេញតម្រូវការទាំងនោះ ប៉ុន្តែនៅពេលតែមួយនោះប្រតិបត្តិការរបស់​យើងបានជួបឧបសគ្គយ៉ាងច្បាស់លាស់។

មន្ត្រីផ្តល់ជំនួយសហរដ្ឋអាមេរិក ​ជាន់ខ្ពស់ម្នាក់បានព្រមាននៅសប្តាហ៍នេះថា ប្រជាជនអាហ្វហ្គានីស្ថាន​ស្ថិតក្នុងឆ្នាំដ៏លំបាកនៅចំពោះមុខ ខណៈម្ចាស់ជំនួយ បានទប់ទល់​នឹងប្រឈមពីការបង្ក្រាបរបស់រដ្ឋបាលក្រុមតាលីបង់ទៅលើស្ត្រី និងក្មេងស្រី វិបត្តិច្រើន​នៅជុំវិញពិភពលោក និងការផ្តល់មូលនិធិកាន់តែតិច។