ភ្នំពេញ៖ យប់ឈានចូលថ្ងៃទី៦ ខែឧសភានេះ ឯកឧត្តមនាយឧត្តមសេនីយ៍ ប៉ុល សារឿន ទេសរដ្ឋមន្រ្តីទទួលបន្ទុកការងារបញ្ជូនកងកម្លាំងចូលរួមបេសកកម្មរក្សាសន្តិភាព បានជូនដំណើរ​ទ័ពមួកខៀវ​កម្ពុជាចំនួនជាង ២៤០រូប អញ្ជើញបំពេញបេសកកម្មប្តូរវេនថែរក្សាសន្តិភាពអង្គការ​សហប្រជាជាតិនៅសាធាណរដ្ឋអាហ្វ្រិកកណ្តាលរយៈពេល១ឆ្នាំ។

តាមការឲ្យដឹងពីនាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិរក្សាសន្តិភាព ថា ទ័ពមួកខៀវទាំង២៤៤រូប ក្នុងនោះ​មានស្ត្រី៣០រូប គឺជាកងកងវិស្វកម្មលេខ៤២៣ ហើយក៏ជាឆ្នាំ និងកងទី៩ ​ដែល​កម្ពុជា​បញ្ជូន​ប្តូរវេន ដើម្បីបន្តការស្ថាបនាសំណង់ដេក ​និងសំណង់បញ្ឈរ នៅសាធារណរដ្ឋអាហ្រ្វិកកណ្តាល តាមសំណើរអង្គការសហប្រជាជាតិ UN ។

ក្នុងឱកាសនោះ ឯកឧត្តម នាយឧត្តមសេនីយ៍ ប៉ុល សារឿន ថ្លែងថា ក្នុងរយៈពេល១៧ឆ្នាំមកនេះ កម្ពុជា ​បានបញ្ជូនកងកម្លាំងជិត ៩ពាន់នាក់ ចូលរួមបេសកកម្មរក្សាសន្តិភាពUN ដោយទទួល​បានស្នាដៃយ៉ាងធំធេងជាបន្តបន្ទាប់ចាប់តាំងពីឆ្នាំ២០០៦មក ហើយ ​ឯកឧត្តម ក៏សូមកោត​សរសើរ​ដោយស្មោះ និងដឹងគុណ ចំពោះពលិកម្មនៃកងកម្លាំងកម្ពុជា ដែលជាវិរបុរសថែរក្សា​សន្តិភាព​នៅ​បណ្តាប្រទេសកំពុងមានជម្លោះ ​និងសង្គ្រាម។

ឯកឧត្តម ប៉ុល សារឿន បន្តថា គិតមកដល់ចុងឆ្នាំ២០២២ កម្ពុជាជាប់លំដាប់លេខរៀងទី៥ ទូទាំង​ពិភពលោក ដែលមានសមាមាត្រដាក់ពង្រាយកងកម្លាំងជាស្រ្តី​ ក្នុងចំណោម៧៨ប្រទេស ដែលបរិច្ចាគកម្លាំង។

ឯកឧត្តម បន្តថា តាមរយៈការបញ្ជូនកងកម្លាំងជាស្ត្រីនេះ គឺបានធ្វើឲ្យកម្ពុជាសម្រេច​បាននូវការ​អនុវត្ត​យុទ្ធសាស្រ្ត សមភាពយេនឌ័ររបស់UN ​ប្រទេសបរិច្ចាគ ​កងកម្លាំង ទាំងអស់ ​ដែលនឹងកំណត់ ឱ្យចល័តកម្លាំងនារី ​ជានាយទាហានសេនាធិការដល់ទៅ២៥% ។

សូមបញ្ជាក់ថា ការបញ្ជូនបេសកកម្មប្តូរវេនថែរក្សាសន្តិភាពអង្គការ​សហប្រជាជាតិ​នៅ​សាធាណរដ្ឋ​អាហ្វ្រិក​កកណ្តាលរយៈពេល១ឆ្នាំនៅពេលនេះ បានធ្វើឡើងក្រោយពីកងទ័ព​មួកខៀវ២១៩នាក់​លេខ៤៣២ ​បញ្ចប់បេសកកម្ម១ឆ្នាំ និងបានធ្វើមាតុភូមិនិវត្តន៍ដល់កម្ពុជា នៅថ្ងៃទី៥ ខែឧសភាម្សិលមិញនេះ៕ អត្ថបទ ស៊ុម សុខជា