អ្នកជំនាញផ្នែកវេជ្ជសាស្ត្រចិន និយាយថា ជំងឺ Covid-19 នៅតែមានសេសសល់ ប៉ុន្តែបច្ចុប្បន្ននេះ ​ពិភពលោកមានសមត្ថភាពក្នុងការគ្រប់គ្រងផល​ប៉ះពាល់អវិជ្ជមានរបស់ខ្លួន ដោយ​អធិប្បាយ​ចំពោះការដក ​ជំងឺរាតត្បាតចេញពីគ្រាអាសន្នសុខភាពសាធារណៈនៃកង្វល់អន្តរជាតិ របស់​អង្គការសុខភាពពិភពលោក ​កាលពីថ្ងៃសុក្រថា ជាជោគជ័យតាមតំណាក់កាល។

អគ្គនាយកអង្គការសុខភាពពិភពលោក លោក Tedros Adhanom Ghebreyesus បានប្រកាស​កាល​ពីថ្ងៃសុក្រថា ជំងឺរាតត្បាត Covid-19 លែងជាគ្រាអាសន្នសុខភាពសាធារណៈនៃកង្វល់​អន្តរជាតិ​ទៀត​ហើយ ជាកម្រិតប្រកាសអាសន្នខ្ពស់បំផុតរបស់អង្គការសុខភាពពិភព​លោក​មួយនេះ។

យោងតាមលោក Liang Wannian ប្រធានគណៈកម្មការអ្នកជំនាញឆ្លើយតបជំងឺ Covid-19 របស់ គណៈកម្មាធិការសុខភាពជាតិប្រទេសចិន បានឲ្យដឹងថា គណៈកម្មាធិការគ្រាអាសន្នវិធាន​ការ​សុខភាព​អន្តរជាតិ​ បានពិចារណាលើលក្ខណៈវិនិច្ឆ័យ​នៃគ្រាអាសន្នសុខភាពសាធារណៈនៃកង្វល់​អន្តរជាតិថាតើជំងឺ Covid-19 ​បន្តបង្កើតព្រឹត្តិការណ៍ខុសប្លែកពីធម្មតាឬយ៉ាងណា ហានីភ័យសុខភាព​សាធារណៈចំពោះរដ្ឋផ្សេងទៀត​តាមរយៈការរាលដាលជាអន្តរជាតិ និងតម្រូវការដ៏មានសក្តានុពល​នូវ​ការឆ្លើយតបអន្តរជាតិដែលបានសម្របសម្រួល។

យោងតាមស្ថិតិរបស់ទីភ្នាក់ងារអង្គការសហប្រជាជាតិ បានឲ្យដឹងថា គិតត្រឹមថ្ងៃទី៣ ខែឧសភា ឆ្នាំ២០២៣ មានករណីជំងឺ Covid-19 ដែលបានបញ្ជាក់ចំនួន ជាង៧៦៥លាន​ករណី​ទូទាំង​ពិភពលោក រួមទាំងអ្នកស្លាប់ជាង ៦,៩ លាននាក់ ដែលបានរាយការណ៍មកកាន់អង្គការ​សុខភាពពិភពលោក។