ភ្នំពេញ៖ ក្នុងឱកាសដែលត្រូវបានសម្ដេចតេជោ ហ៊ុន សែន នាយករដ្ឋមន្ត្រីកម្ពុជាអនុញ្ញាតឱ្យចូលជួបសំដែងការគួរសមនៅវិមានសន្តិភាពនាល្ងាចថ្ងៃទី៦ ឧសភានេះ ឯកឧត្ដម កៃរ៉ាឡា សាណាណា ហ្គូសម៉ៅ(Kay Rala Xanana Gusmao ) អតីតប្រធានាធិបតី និងនាយករដ្ឋន្ត្រីទីម័រខាងកើត បានគោរពសម្ដែងនូវការ ភ្ញាក់ផ្អើលយ៉ាងខ្លាំងចំពោះការរីកចម្រើនយ៉ាងឆាប់រហ័សរបស់កម្ពុជា។
ឯកឧត្តម អ៊ាង សុផល្លែត ជំនួយការផ្ទាល់សម្តេចតេជោបានឱ្យដឹងថា នៅក្នុងជំនួបនេះ ជាមួយនឹងការភ្ញាក់ផ្អើលចំពោះការរីកចម្រើនយ៉ាងឆាប់រហ័សរបស់កម្ពុជា ឯកឧត្តម កៃរ៉ាឡា សាណាណា បានសម្ដែងនូវការអបអរសាទរជូនចំពោះសម្ដេចតេជោ និងប្រជាជនកម្ពុជាទាំងមូល ចំពោះព្រឹត្តិការណ៍រៀបចំបើកស៊ីហ្គេមលើកទី៣២ នៅកម្ពុជា។
ឯកឧត្តម បានមានប្រសាសន៍ថានេះជាលើកទីមួយហើយដែលឯកឧត្តមបានធ្វើជាសាក្សីនៃព្រឹត្តិការណ៍ដ៏អស្ចារ្យ ជាប្រវត្តិសាស្ត្រនេះ។ ឆ្លៀតក្នុងឱកាសនោះដែរ ឯកឧត្តម កៃរ៉ាឡា សាណាណា បានគោរពថ្លែងអំណរគុណជូនចំពោះសម្ដេចតេជោ រាជរដ្ឋាភិបាលកម្ពុជាដែលបានជួយដល់ទីម័រខាងកើត ឱ្យបានចូលជាសមាជិកអាស៊ាន ជួយទីម័រខាងកើតក្នុងការទប់ស្កាត់ការរីករាលដាលនៃជំងឺកូវីដ១៩ និងបានគោរពស្នើសុំសម្ដេចតេជោ ពិនិត្យជួយដល់វិស័យកសិកម្ម ដើម្បី កាត់បន្ថយការនាំចូលស្បៀងពីប្រទេសដទៃ។
ជាការឆ្លើយតប សម្ដេចតេជោ ហ៊ុន សែន បានថ្លែងអំណរគុណជូនចំពោះឯកឧត្តម កៃរ៉ាឡា សាណាណា ដែលបានអញ្ជើញមកចូលរួមក្នុង ព្រឹត្តិការបើកស៊ីហ្គេមនៅ ព្រះរាជាណាចក្រកម្ពុជានិងបានជូនកីឡាករ កីឡាការិនី ទីម័រខាងកើត មកប្រកួតដែលធ្វើឲ្យស៊ីហ្គេមនៅព្រះរាជាណាចក្រកម្ពុជា មានភាពកាន់តែអធឹកអធមឡើងថែមទៀត។
ពាក់ព័ន្ធនឹងការងារអាស៊ានសម្ដេចតេជោបានជំរាបជូនជាអនុសាសន៍ឱ្យពិនិត្យយកចិត្តទុកដាក់លើការងារលើសសរស្ដម្ភទាំងបី។
ដោយឡែកលើវិស័យកសិកម្ម សម្ដេចតេជោបានជម្រាបជូនឯកឧត្តមថាសម្ដេចនឹង បញ្ជូនអ្នកជំនាញកសិកម្មទៅពិនិត្យ ស្ថានភាពដីនិងស្ថានភាពទីតាំងជាក់ស្ដែង ជួយដល់ការងារកសិកម្ម ផលិតកម្ម ដល់ទីម័រខាងកើត៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
