ទឹកជំនន់ដ៏គំហុក នៅតំបន់ភាគខាងកើតសាធារណរដ្ឋប្រជាធិបតេយ្យកុងហ្គោ បានសម្លាប់មនុស្សជិត២០០នាក់ និងបំផ្លិចបំផ្លាញអគារ ភូមិឋានប្រជាពលរដ្ឋ និងបង្ខំឲ្យក្រុមការងារជំនួយដាក់គរសាកសពប្រឡាក់ដោយភក់លើគ្នា ។

ភ្លៀងធ្លាក់នៅខេត្ត South Kivu បណ្តាលឲ្យទឹកទន្លេហូរប្រៀបច្រាំងកាលពីពេល១ថ្ងៃមុន ដោយបានជន់លិចភូមិ Bushushu និង Nyamukubi និងបានសម្លាប់មនុស្សជាង ១៧៥នាក់ ។

គេបានមើលឃើញប្រជាពលរដ្ឋនាំគ្នាជីកកកាយភក់ ដើម្បីយកសាកសពចេញ ។

អ្នករស់រានពីទឹកជំនន់ បានជួបជុំគ្នានៅក្រៅរោងឈើ ជាទីដែលក្រុមការងារកាកបាទក្រហម ដាក់គរសាកសពលើគ្នា ។

អ្នកភូមិមួយចំនួនបានរៀបរាប់ពីការបាត់បង់មិននឹកស្មានដល់របស់ពួកគេ ។ អ្នកភូមិម្នាកនិយាយថា ខ្ញុំបាត់បង់ប្តីរបស់ខ្ញុំ ហើយឥឡូវខ្ញុំសល់តែកូន ៥នាក់ទេ ខណៈដែលអ្នកភូមិម្នាក់ទៀតនិយាយថា ខ្ញុំបាត់បង់ភរិយារបស់ខ្ញុំ និងកូន ១៦នាក់របស់ខ្ញុំ ពួកគេស្លាប់អស់ហើយ ឥឡូវខ្ញុំនៅតែម្នាក់ឯងប៉ុណ្ណោះនៅផ្ទះរបស់ខ្ញុំ ។

លោក Martin Ngonyozi គឺជាប្រធានក្រុមសង្គមស៊ីវិល និយាយថា ប្រជាពលរដ្ឋគ្មាន កន្លែងរស់ នៅនោះទេ ហើយក៏គ្មានអ្វីទទួលទាននោះដែរ ។

សូមបញ្ជាក់ថា ទឹកជំនន់ និងបំណាក់ដី ​បានក្លាយជារឿងធម្មតាទៅហើយនៅខេត្ត South Kivu ដែលជាប់ព្រំដែនជាមួយប្រទេសរ៉្វាន់ដា ​ជាកន្លែងដែលភ្លៀងធ្លាក់ក្នុងសប្តាហ៍នេះ បានសម្លាប់មនុស្សជាង ១៣០នាក់ និងបានបំផ្លិចបំផ្លាញផ្ទះប្រជាពលរដ្ឋជាង ៥ពាន់ខ្នង ៕