ជប៉ុន ៖​ នៅថ្ងៃអាទិត្យ (៧ ឧសភា)នេះ នាយករដ្ឋមន្ត្រីជប៉ុន លោក Fumio Kishida បានទៅកាន់ទីបញ្ចុះសព​ជាតិដើម្បី​គោរពវិញ្ញាណក្ខន្ធអ្នកស្លាប់ក្នុងសង្គ្រាម មុនពេលជួបជាមួយប្រធានាធិបតីថ្មីរបស់កូរ៉េខាងត្បូង លោកYoon Suk Yeol នៅទីក្រុងសេអ៊ូល។

លោក Kishida និងភរិយាលោកស្រី Yuko បានដាក់កម្រងផ្កានៅមុខវិមានអនុស្សាវរីយ និងអុជធូប ក្រោយមកបាន​គោរព​វិញ្ញាណក្ខន្ធទាហានដែលបានស្លាប់ក្នុងសង្គ្រាមកូរ៉េឆ្នាំ ១៩៥០-៥៣ ដោយស្ងៀមស្ងាត់។

ដំណើរទស្សនកិច្ចលើកដំបូងរបស់មេដឹកនាំជប៉ុនលោក Kishida ទៅកាន់ទីក្រុងសេអ៊ូលក្នុងរយៈពេល ១២ ឆ្នាំ ធ្វើឡើងជាការឆ្លើយតបនឹងដំណើរទស្សនកិច្ចរបស់លោកប្រធានាធិបតី Yoon នៅទីក្រុងតូក្យូកាលខែមីនា ជាទីដែល​ភាគីទាំងពីរព្យាយាមបិទទំព័រស្តីពីជម្លោះប្រវត្តិសាស្ត្រដែលបានគ្របដណ្ដប់លើទំនាក់ទំនងទ្វេភាគីជាច្រើនឆ្នាំ។

លោក Yoon កំពុងប្រឈមមុខនឹងការរិះគន់នៅក្នុងប្រទេសកូរ៉េខាងត្បូងរបស់ខ្លួន ដោយលោកបានផ្តល់ឱ្យ​ច្រើន​ជាងអ្វីដែលទទួលបាននៅក្នុងកិច្ចខិតខំប្រឹងប្រែងរបស់លោកក្នុងការធ្វើឱ្យទំនាក់ទំនងជាមួយ​ប្រទេស​ជប៉ុន​ប្រសើរឡើង រួមមានការស្នើឱ្យបណ្ដាអាជីវកម្មកូរ៉េខាងត្បូងជាអ្នកផ្តល់សំណងដល់ក្រុមជនរងគ្រោះនៃពលកម្មដោយបង្ខំក្នុង

អំឡុងសម័យសង្គ្រាមក្រោមការគ្រប់គ្រងអាណានិគមន៍និយមរបស់ជប៉ុនឆ្នាំ១៩១០-១៩៤៥ ​ដោយពុំមែនជាក្រុម​ហ៊ុននានារបស់ជប៉ុន ដែលត្រូវអនុវត្តន៍តាមការបញ្ជារបស់តុលាការនោះ ៕