អន្តរជាតិ ៖ កាលពីថ្ងៃសៅរ៍ (០៦ ឧសភា) រដ្ឋមន្ត្រីការពារជាតិឥណ្ឌា លោក Rajnath Singh បានចុះពិនិត្យស្រុករ៉ាជូរី ភាគខាងជើង​នៃដែនដីសហព័ន្ធជែមមូនិងកាស្មៀរ ដើម្បីគ្រប់គ្រងស្ថានការណ៍សន្តិសុខ បន្ទាប់ពីទាហាន ៥ នាក់ត្រូវបានសម្លាប់ និងម្នាក់ទៀតរងរបួស​ក្នុងប្រតិបត្តិការប្រឆាំងក្រុមសកម្មប្រយុទ្ធ។

កងកម្លាំងការពារជាតិឥណ្ឌាបានចាប់ផ្តើមធ្វើប្រតិបត្តិការជាច្រើននៅក្នុងស្រុករ៉ាជូរី នៃតំបន់ភ្នំហិមាល័យ ចាប់តាំងពីក្រុមវាយប្រហារ​មិនស្គាល់អត្តសញ្ញាណ បានបើកការបាញ់ប្រហារទៅលើរថយន្តរបស់កងទ័ពឥណ្ឌា កាលពីខែមុន។

កងទ័ពបាននិយាយនៅក្នុងសេចក្តីថ្លែងការណ៍មួយថា ក្រុមរុករករបស់យោធាមួយក្រុម បានពើបប្រយុទ្ធជាមួយ​ក្រុមសកម្មប្រយុទ្ធនៅ​ក្នុងតំបន់មួយដែល "សម្បូរដោយថ្ម និងចំណោតថ្ម" កាលពីព្រឹកថ្ងៃសុក្រ (៥ ឧសភា)។

ទន្ទឹមនឹងនេះ អភិបាលរងនៃតំបន់ជែមមូនិង កាស្មៀរ លោក Manoj Sinha បានចូលរួមគោរពវិញ្ញាណក្ខន្ធ​ដល់ក្រុមទាហានដែល​បានបាត់បង់ជីវិតនៅក្នុងទីក្រុងនៃតំបន់ជែមមូដោយដាក់កម្រងផ្កានៅលើមឈូសរបស់ពួកគេ។ តំបន់កាស្មៀត្រូវបានអះអាងសិទ្ធិទាំងស្រុង ប៉ុន្តែត្រូវគ្រប់គ្រងដោយផ្នែក ដោយប្រទេសមានអាវុធនុយក្លេអ៊ែរជិតខាងទាំងពីរគឺឥណ្ឌា និងប៉ាគីស្ថាន។

រដ្ឋធានីញូវដេលីបានចោទប្រកាន់ប៉ាគីស្ថានថាបានបង្កការបះបោរអស់រយៈពេលជាច្រើនទសវត្សរ៍នៅក្នុងតំបន់កាស្មៀរ។ ប៉ុន្តែរដ្ឋធានី Islamabad របស់ប៉ាគីស្ថាន បានបដិសេធការចោទប្រកាន់នោះ ដោយនិយាយថា ខ្លួនគ្រាន់តែផ្តល់ការគាំទ្រខាងការទូត និងស្មារតីដល់ប្រជាជនរស់នៅក្នុងតំបន់កាស្មៀរ ដែលទាមទារសិទ្ធិស្វ័យសម្រេចតែប៉ុណ្ណោះ៕