មនុស្ស៧នាក់ស្លាប់នៅក្នុងទីក្រុង Brownsville រដ្ឋ Texas សហរដ្ឋអាមេរិក បន្ទាប់ពីរថយន្តមួយគ្រឿង បានបើកបុកក្រុមអ្នកថ្មើរជើង កាលពីព្រឹកថ្ងៃអាទិត្យ ខណៈពួកគេកំពុងរង់ចាំនៅចំណតរថយន្តក្រុង។

អ្នកតំណាងមួយរូបមកពីការិយាល័យនគរបាលក្រុង Brownsville បានប្រាប់សារព័ត៌មាន ABC Newsថា ឧបទ្ទវហេតុនេះ បានកើតឡើងនៅម៉ោង៨និង៣០នាទីព្រឹកនៅជិតមជ្ឈមណ្ឌល Ozanam នៅក្នុងទីក្រុង Brownsville នៅពេលរថយន្ត Range Rover ពណ៌ប្រផះមួយគ្រឿង បានបំបុកចូលចំណតរថយន្តក្រុង ។

យោងតាមនគរបាល ក្រៅពីអ្នកស្លាប់ទាំងនោះ មនុស្សចំនួន១០នាក់កំពុងសម្រាកព្យាបាល របួសធ្ងន់ និងស្រាលនៅមន្ទីរពេទ្យ។

ក្រុមអាជ្ញាធរ បាននិយាយថា នគរបាលបានចាប់ខ្លួនជនសង្ស័យជាបុរសម្នាក់​ដែលជា​ប្រជាពលរដ្ឋក្នុងទីក្រុង Brownsville កំពុងត្រូវបានឃុំខ្លួន និងទទួលការព្យាបាលផ្នែកវេជ្ជសាស្ត្រ។

នគរបាលនិយាយថា ជនសង្ស័យកំពុងត្រូវបានឃុំខ្លួននៅក្នុងពន្ធនាគារក្រុង និងមិនព្រមនិយាយអ្វីទាំងអស់។

យោងតាម លោកMartin Sandoval ស្នងការនគរបាលក្រុង Brownsville អ្នកមួយចំនួន ដែលត្រូវបានរថយន្តបុកកាលពីថ្ងៃអាទិត្យគឺជាជនអន្តោប្រវេសន៍។

នគរបាលបាននិយាយថា អ្នកបើកបររថយន្ត កំពុងត្រូវបានសម្រាកព្យាបាលនៅមន្ទីរពេទ្យ ហើយស្ថិតក្រមការយាមកាម២៤ម៉ោង ។

ការធ្វើតេស្តត្រូវបានធ្វើដើម្បីពិនិត្យមើលសម្រាប់ការប្រើប្រាស់គ្រឿងញៀន និងគ្រឿងស្រវឹង។

ក្រុមអ្នកស៊ើបអង្កេត ពុំទាន់បានផ្ដល់ការអត្ថាធិប្បាយនៅឡើយទេ លើមូលហេតុណាមួយ ឬ ថាតើការបើករថយន្តបុកក្រុមមនុស្សនេះ ជាចេតនា ឬយ៉ាងណា៕