ប្រធានាធិបតីប្រទេសកូរ៉េខាងត្បូងលោក Yoon Suk-yeol បានជួបពិភាក្សាជាមួយនាយករដ្ឋមន្ត្រីជប៉ុនលោក Fumio Kishida ក្នុងទីក្រុងសេអ៊ូល បន្ទាប់ពីការប្រារព្ធពិធីស្វាគមន៍ នៅវិមានប្រធានាធិបតី កាលពីថ្ងៃអាទិត្យ។

លោក Yoon បានថ្លែងសុន្ទរកថា បើកនៅក្នុងជំនួបបានឲ្យដឹងថា កិច្ចសហប្រតិបត្តិការ និងការសម្របសម្រួល រវាងប្រទេសកូរ៉េខាងត្បូង និងប្រទេសជប៉ុន មានសារៈសំខាន់ មិនត្រឹមតែសម្រាប់ផលប្រយោជន៍រួមរបស់ប្រទេសទាំងពីរប៉ុណ្ណោះទេ ប៉ុន្តែថែមទាំងសម្រាប់សន្តិភាព និងវិបុលភាពនៅលើពិភពលោក។

លោក Kishida បានប្រាប់លោក Yoon ថាការឈឺចាប់ក្នុងចិត្តរបស់លោក នៅពេលលោកគិតអំពីការ ទទួលរង និងការឈឺចាប់ អំឡុងរបបអាណានិគម ក្នុងការបង្ហាញចំពោះជម្លោះប្រវត្តិសាស្ត្រ ដែលបានធ្វើឲ្យខូចខាតដល់ទំនាក់ទំនងរវាងប្រទេសទាំងពីរ។

ថ្លែងទៅកាន់សន្និសីទសារព័ត៌មានបន្ទាប់ពីជំនួប លោក Kishida បាននិយាយថា រដ្ឋាភិបាលរបស់​លោក ទទួលជាមរតកនូវជំហរពីរដ្ឋបាលមុនៗ ដែលមួយចំនួនបានចេញការសុំអភ័យទោស​រួចហើយ។

លោក Yoon និយាយថាមេដឹកនាំទាំងពីរ បានព្រមព្រៀងបញ្ជូនអ្នកជំនាញ ដើម្បីធ្វើការវិភាគបែប​វិទ្យាសាស្ត្រ មុនពេលបញ្ចេញទឹកដែលមានសារធាតុពុល នុយក្លេអ៊ែរ ពីរោងចក្រថាមពល​នុយក្លេអ៊ែរ Fukushima Daiichi ចូលទៅក្នុងមហាសមុទ្រ។

សារព័ត៌មាន Yonhap បានរាយការណ៍ថា លោក Kishida បានមកដល់ប្រទេសកូរ៉េខាងត្បូង កាល​ពីថ្ងៃអាទិត្យ ដែលបានកត់សំគាល់ពីការបន្តទ្រង់ទ្រាយពេញលេញផ្នែកការទូតដែលបានបិទ រវាងមេដឹកនាំប្រទេសទាំងពីរបន្ទាប់ពីរយៈពេល១២ឆ្នាំមកនេះ។

យោងតាមសារព័ត៌មាន Kyodo បានឲ្យដឹងថា លោក Kishida បានក្លាយជាមេដឹកនាំ​នយោបាយ​ដំបូង​គេរបស់ប្រទេសជប៉ុន ដែលមកធ្វើទស្សនកិច្ចនៅប្រទេសកូរ៉េខាងត្បូងក្នុង​រយៈពេល​ជាង​៥ឆ្នាំ ខណៈប្រទេសទាំងពីរ ស្វះស្វែងធ្វើឲ្យប្រសើរឡើងនូវទំនាក់ទំនង។

អ្នកតំណាងមកពី ក្រុមស៊ីវិលកូរ៉េខាងត្បូងជាច្រើនក្រុម បានមកប្រមូលផ្តុំគ្នាកាលពីចុងសប្តាហ៍​នៅខាងមុខការិយាល័យប្រធានាធិបតី និងមជ្ឈមណ្ឌល​ទីក្រុងសេអ៊ូល ដើម្បីតវ៉ាប្រឆំាង​ដំណើរទស្សនកិច្ចរយៈពេល២ថ្ងៃរបស់លោក Kishida មកកាន់ទីក្រុងសេអ៊ូល។