អាជ្ញាធរបាននិយាយកាលពីថ្ងៃអាទិត្យទី៧ ខែឧសភាថា អគ្គិភ័យនៅក្នុងអណ្តូងរ៉ែមាសតូចមួយ នៅប្រទេសប៉េរូភាគខាងត្បូង បានបណ្តាលឲ្យមនុស្ស២៧នាក់ស្លាប់ ក្នុងឧបត្តិហេតុអណ្តូងរ៉ែតែមួយលើក មានមនុស្សស្លាប់ច្រើនបំផុតរបស់ប្រទេសនេះ ក្នុងរយៈពេលជាង២ទសវត្សរ៍មកនេះ។

នៅក្នុងសេចក្តីថ្លែងការណ៍ រដ្ឋាភិបាលតំបន់ បាននិយាយថា ការឆ្លងចរន្តអគ្គិសនី បង្កឲ្យមានអគ្គិភ័យ កាលពីព្រឹកថ្ងៃសៅរ៍ នៅតំបន់ Arequipa ភាគខាងត្បូង។ អណ្តូងរ៉ែនេះ ត្រូវបានធ្វើប្រតិបត្តិការដោយក្រុមហ៊ុន Yanaquihua ជាក្រុមហ៊ុនតូចមួយ។ ក្រុមហ៊ុនពុំបានឆ្លើយតបភ្លាមៗចំពោះសំណើរសុំអត្ថាធិប្បាយនោះទេ។

កាលពីព្រឹកថ្ងៃអាទិត្យ សាច់ញាតិ​ជនរងគ្រោះ បានមកប្រមូលផ្តុំគ្នា នៅច្រកចូលអណ្តូងរ៉ែ ដើម្បីទទួលបានព័ត៌មានបន្ថែមទៀត ពីមនុស្សជាទីស្រលាញ់របស់ពួកគេ។ ប្រទេសប៉េរូ គឺជាប្រទេសផលិតមាសដ៏ធំមួយរបស់ពិភពលោក និងជាប្រទេសផលិតទង់ដែងធំបំផុតទី២។

យោងតាមទិន្នន័យពីក្រសួងរ៉ែ និងថាមពល ​បានឲ្យដឹងថា ឧបត្តិហេតុនេះគឺជា​ឧប្បត្តិហេតុ​អណ្តូងរ៉ែដែលមានមនុស្សស្លាប់ច្រើនបំផុតតែមួយ ចាប់តាំងពីឆ្នាំ២០០០មក។

កាលពីឆ្នាំ២០២២ មនុស្ស៣៨នាក់​ បានស្លាប់ក្នុងឧបត្តិហេតុអណ្តូងរ៉ែ ​នៅទូទាំងប្រទេស ដែលកំពុង​បង្ហាញពីការព្រួយបារម្ភផ្នែកសុវត្ថិភាព ​នៅក្នុងអណ្តូងរ៉ែនៅប្រទេសអាមេរិកឡាទីនមួយនេះ។