យោងតាមការអះអាងពីក្រុមមន្រ្តីមន្ទីរពេទ្យ និងកងទ័ពឥណ្ឌា បានឲ្យដឹងថា អំពើហិង្សាជនជាតិភាគតិចនៅរដ្ឋ Manipurប្រទេសឥណ្ឌា បានសម្លាប់មនុស្សជាង ៥០នាក់ មនុស្សរាប់រយនាក់ផ្សេងទៀត រងរបួសត្រូវបានបញ្ជូនទៅព្យាបាលនៅមន្ទីរពេទ្យ និងមនុស្ស ២៣.០០០នាក់ ត្រូវបានជម្លៀសខ្លួន ។

ក្រុមមន្រ្តីមន្ទីរពេទ្យនៅទីក្រុង Imphal បាននិយាយកាលពីថ្ងៃអាទិត្យថា មនុស្សយ៉ាងហោច ៥៥នាក់ បានបាត់បង់អាយុជីវិត ហើយមនុស្ស ២៦០នាក់បន្ថែមទៀត ត្រូវបានបញ្ជូនទៅព្យាបាល នៅ​មន្ទីរពេទ្យ ចាប់តាំងពីអំពើ ហិង្សាផ្ទុះឡើងរវាងសមាជិកក្រុមជនជាតិភាគតិច Kuki និងក្រុមជនជាតិភាគតិច Meitei កាលពីដើមសប្តាហ៍មុន ។

ស្របពេលនោះដែរ យោធាឥណ្ឌា និយាយថា ជនស៊ីវិល ២៣.០០០នាក់ បានរត់ភៀសខ្លួនចេញ​ពី​អំពើហិង្សានេះ ដោយពួកគេទទួលបានការស្នាក់នៅបណ្តោះអាសន្ន​នៅតាមមូលដ្ឋានយោធា និងយោធភូមិភាគនៅក្នុងរដ្ឋ Manipur។

ជនជាតិភាគតិចទាំង ២ក្រុម បានប៉ះទង្គិចគ្នានៅតាមផ្លូវនៅក្នុងទីក្រុង Imphal ស្ថិតនៅភាគខាងកើត​ប្រទេសឥណ្ឌា និងនៅតាមទីកន្លែងផ្សេងទៀត ។

យោងតាមការអះអាងពីក្រុមមន្រ្តីនៅមន្ទីរពេទ្យវិទ្យាស្ថានវិទ្យាសាស្រ្តសុខាភិបាលក្នុងតំបន់ មន្ទីរពេទ្យវិទ្យាស្ថាន​វិទ្យាសាស្រ្តសុខាភិបាល Jawaharlal Nehru និងមន្ទីរពេទ្យស្រុក Churachandpur ស្ថិតក្នុងទីក្រុង Imphal បានឲ្យដឹងថា របួសភាគច្រើនបង្កឡើងដោយសារគ្រាប់កាំភ្លើង ។

លោកវេជ្ជបណ្ឌិត Mang Hatzow គឺជាគ្រូពេទ្យនៅមន្ទីរពេទ្យស្រុក Churachandpurនិយាយប្រាប់ CNNថា ភាគច្រើននៃអ្នករបួសធ្ងន់ធ្ងរដោយសារត្រូវគ្រាប់កាំភ្លើង ឬរងរបួសក្បាលដោយសារត្រូវនឹងដំបង ។

រូបភាពវីដេអូ និងរូបភាពសន្លឹកនៅលើកញ្ចក់ទូរទស្សន៍ក្នុងស្រុក ឃើញរថយន្ត និងអគាររងការ​ដុតបំផ្លាញ ហើយផ្សែងខ្មៅដ៏ក្រាស់ ​បានហុយពីលើដងផ្លូវ ។ ដោយឡែកទាហានឥណ្ឌា ត្រូវបាន​បញ្ជូនទៅកាន់ដងផ្លូវជាទីកន្លែងកើតហេតុផ្ទុះអំពើហិង្សា ​ហើយការបិទប្រព័ន្ធ អ៊ីនធឺណិតរយៈពេល​៥ថ្ងៃ បានចូលជាធរមានផងដែរ ៕