​អតីត​ប្រធានាធិបតី​សហរដ្ឋអាមេរិក​លោក Donald Trump បាន​ច្រានចោល​ឱកាស​ចុងក្រោយ​របស់លោក​ដើម្បី​ផ្តល់​សក្ខីកម្ម​នៅ​ការកាត់ក្តី​រដ្ឋបវេណី ជាទី​ដែល​អ្នកសរសេរ​អត្ថបទ​កាសែត​គឺ​នាង E Jean Carroll បាន​ចោទប្រកាន់​រូបលោក​ថា​បាន​ចាប់រំលោភ​សេពសន្ថវៈ​លើ​រូបអ្នក​ស្រី​ក្នុង​បន្ទប់​ផ្លាស់​សម្លៀកបំពាក់​នៅ​ហាង​លក់​សម្លៀកបំពាក់​ទំនើប​កាលពី​ឆ្នាំ ១៩៩៦។

​លោក Trump ដែលជា​បេក្ខជន​ប្រធានាធិបតី​មកពី​គណបក្ស​សាធារណរដ្ឋ​សម្រាប់​ការបោះឆ្នោត​ឆ្នាំ ២០២៤ នោះ ត្រូវបាន​ចៅក្រម​សហព័ន្ធ​ប្រចាំ​តំបន់​របស់​សហរដ្ឋអាមេរិក លោក Lewis A Kaplan ផ្តល់​ពេល​ត្រឹម​ម៉ោង ៥​ល្ងាច ម៉ោង​ក្នុងស្រុក​(​ត្រូវ​នឹង​ម៉ោង ៩​យប់ ម៉ោង​សកល​)​ថ្ងៃអាទិត្យ ដើម្បី​ដាក់​សំណើសុំ​ផ្តល់​សក្ខីកម្ម ប៉ុន្តែ​គ្មាន​សំណើ​ណាមួយ​ត្រូវបាន​ដាក់ជូន​នោះឡើយ ។

​ទោះបីជា​យ៉ាងណាក៏ដោយ វា​ពុំមែន​ជា​រឿង​គួរ​ភ្ញាក់ផ្អើល​នោះទេ។ លោក Trump​ពុំបាន​បង្ហាញខ្លួន​នោះឡើយ​អំឡុង​ការកាត់ក្តី​នៅ​ទីក្រុង New York រយៈពេល ២​សប្តាហ៍ ជាទី​ដែល​អ្នកស្រី Carroll បានផ្តល់​សក្ខីកម្ម​ជាច្រើន​ថ្ងៃ ដើម្បី​បញ្ជាក់​អំណះអំណាង​ដែល​អ្នកស្រី បាន​បញ្ចេញ​ជា​សាធារណៈ​លើកដំបូង​នៅក្នុង​ជីវប្រវត្តិ​ឆ្នាំ២០១៩។ លោកស្រី​កំពុង​ស្វែងរក​សំណង និង​ការខូចខាត​តម្លៃ​សរុប​ជា​ទឹកប្រាក់​រាប់លាន​ដុល្លារ​។

​នៅពេលដែល​គ្មាន​ការផ្តល់​សក្ខីកម្ម​របស់​លោក Trump​បែបនេះ ក្រុម​មេធាវី​របស់លោក នឹង​ផ្តល់​សេចក្តី​សំអាង​នៅ​ថ្ងៃ​ចន្ទ ក្នុងនោះ​ការពិភាក្សា​សម្រេច​នឹង​ចាប់ផ្តើម​នៅ​ថ្ងៃ​អង្គារ ។

នៅពេលដែល​ដើមចោទ​បញ្ចប់​ករណី​របស់​ពួកគេ​កាលពី​ថ្ងៃ​ព្រហស្បតិ៍ មេធាវី​របស់លោក Trump​គឺ​លោក Joe Tacopina​បានបញ្ចប់​ករណី​ការពារ​ភ្លាមៗ​ផងដែរ ក៏ដូចជា​ពុំបាន​កោះហៅ​សាក្សី​ណា​ម្នាក់​នោះឡើយ។ លោក​ក៏​ពុំបាន​ស្នើសុំ​ពេល​បន្ថែមទៀត​ដើម្បី​ឲ្យ​លោក Trump​សម្រេចចិត្ត​លើ​ការផ្តល់​សក្ខីកម្ម​នោះដែរ៕​