នាយករដ្ឋមន្ត្រី​នូ​វែ​ល​ហ្សេ​ឡង់ លោក Chris Hipkins បាន​និយាយ​នៅ​ថ្ងៃ​ចន្ទ (៨ ឧសភា​)​នេះ​ថា ប្រទេស​នូ​វែ​ល​ហ្សេ​ឡង់​នឹង​វិនិយោគ​ថវិកា ៤១៩ លាន​ដុល្លារ​នូវែលហ្សេឡង់ (២៦៥,៤៦លាន​ដុល្លារ​) ដើម្បី​បង្កើន​ប្រាក់បៀវត្សរ៍​របស់​បុគ្គ​លិ​ក​ការពារជាតិ និង ៣២៨លាន​ដុល្លារ​នូ​វែ​ល​ហ្សេ​ឡង់ (២០៧,០៣ លាន​ដុល្លារ​) ដើម្បី​បង្កើន​សមត្ថភាព​គ្រឿងយុទ្ធោបករណ៍ និង​ហេដ្ឋារចនាសម្ព័ន្ធ​របស់​កងកម្លាំង​ការពារជាតិ​។​

​លោក Andrew Little បាន​និយាយ​ក្នុងអំឡុង​សន្និសីទ​សារព័ត៌មាន​នៅ​ទីក្រុង Wellington ថា ការបង្កើន​ប្រាក់បៀវត្សរ៍​ដូចនេះ​ គឺ​ដើម្បី​ឲ្យ​កងកម្លាំង​ការពារជាតិ​អាច​រក្សាបាន និង​ពង្រឹង​បន្ថែម​ជំនាញ​នានា បទពិសោធន៍ ព្រមទាំង​ជំនាញ​ឯកទេស​ដែល​ត្រូវការ​។​

​រដ្ឋមន្ត្រី​ការពារជាតិ​របស់​ប្រទេស​នូ​វែ​ល​ហ្សេ​ឡង់ លោក Andrew Little បាន​និយាយថា ការវិនិយោគ​ចំនួន ៣២៨ លាន​ដុល្លារ​នូ​វែ​ល​ហ្សេ​ឡង់​ទៅលើ​ហេដ្ឋារចនាសម្ព័ន្ធ នឹង​ប្រើប្រាស់​សម្រាប់​បង្កើន​សម​ត្ថ​ភាព​នាវាចម្បាំង និង​រថពាសដែក ក៏ដូចជា​ការកសាង​ទីតាំង​ឥន្ធនៈ​ថ្មី​នៅឯ​មូលដ្ឋាន​ទ័ពអាកាស Ohakea នៅ​កោះ​ខាងជើង​។​

​កងកម្លាំង​ការពារជាតិ​ប្រទេស​នូ​វែ​ល​ហ្សេ​ឡង់ បាន​នឹង​កំពុង​ប្រឈម​នឹង​បញ្ហា​បុគ្គលិក​លាលែង​ពី​តំណែង​ដ៏​ច្រើន​ដែល​បណ្តាលឱ្យមាន​ការផ្អាក​នាវា​ចំនួន​បី​គ្រឿង និង​ការចូលនិវត្តន៍​មុន​កំណត់​របស់​កង​នាវា P-3 Orion ជាហេតុ​ធ្វើឱ្យ​សមត្ថភាព​ឃ្លាំមើល​ដែនអាកាស​របស់​ប្រទេស​នូ​វែ​ល​ហ្សេ​ឡង់​នៅមានកម្រិត​៕​