​នគរបាល​និយាយថា មនុស្ស​២​នាក់​នៅលើ​ដី បាន​ស្លាប់ បន្ទាប់ពី​យន្តហោះ​យោធា MiG-21 ផលិត​នៅ​ប្រទេស​រុស្ស៊ី បាន​ធ្លាក់​ទៅលើ​លំនៅឋាន​មួយ​ខ្នង ក្នុងប្រទេស​ឥណ្ឌា នៅ​ថ្ងៃ​ចន្ទ​នេះ​។ អ​កាស​យានិក ត្រូវបាន​ជួយសង្គ្រោះ​ដោយ​សុវត្ថិភាព​។ មន្ត្រីនគរបាល លោក Sudhir Chaudhary បាន​ប្រាប់​សារព័ត៌មាន AFP បន្ទាប់ពី​ការធ្លាក់​យន្តហោះ​នៅ​រដ្ឋ Rajasthan ភាគ​ខាងលិច​ថា យន្តហោះ​ប្រភេទ​MiG បាន​ធ្លាក់​ទៅលើ​លំនៅឋាន​មួយ​ខ្នង បណ្តាល​ឲ្យ​មនុស្ស​២​នាក់​ស្លាប់ និង​មនុស្ស​៣​នាក់​ផ្សេងទៀត​រងរបួស​។

​កងកម្លាំង​ទ័ពអាកាស​ឥណ្ឌា បាន​បញ្ជាក់ថា ការធ្លាក់​នោះ អាកាសយានិក បាន​លោត​ចេញពី​យន្តហោះ​។​

​កងកម្លាំង​ទ័ពអាកាស បាន​សរសេរ​នៅលើ​បណ្តាញ​សង្គម​ធ្វី​ត​ធ័​រថា យន្តហោះ Mig-21 របស់​កងកម្លាំង​ទ័ពអាកាស​ឥណ្ឌា បាន​ធ្លា​ក់នៅ​ជិត​តំបន់ Suratgarh អំឡុង​ការហ្វឹកហាត់​ប្រចាំថ្ងៃ នៅ​ព្រឹក​ថ្ងៃ​ចន្ទ​នេះ​។​អាកាសយានិក បាន​លោត​ចេញ​ដោយ​សុវត្ថិភាព ដោយ​រងរបួស​ស្រាល​។

ការសាកសួរ​ត្រូវបាន​ធ្វើឡើង ដើម្បី​បញ្ជាក់​ពី​មូលហេតុ​នៃ​ឧបត្តិ​ហេតុនេះ​។ កាលពី​ខែកក្កដា ឆ្នាំ​២០២២ អាកាសយានិក​២​នាក់ បាន​ស្លាប់​នៅពេលដែល​យន្តហោះ MIG-21 បាន​ធ្លាក់​ក្នុង​ការហោះហើរ​ហ្វឹកហ្វឺន នៅក្នុង​រដ្ឋ Rajasthan ។​

​ការធ្លាក់​នោះ គឺជា​យន្តហោះ MIG-21 ទី​៦ ដែល​បាន​ធ្លាក់​ចាប់តាំងពី​ខែមករា ឆ្នាំ​២០២១ បណ្តាល​ឲ្យ​អាកាសយានិក​៥​នាក់ បាន​ស្លាប់​។ យន្តហោះ MIG-21 ផលិត​នៅ​ប្រទេស​រុស្ស៊ី ត្រូវបាន​ដាក់​ឲ្យ​ប្រើប្រាស់​នៅក្នុង​ប្រទេស​ឥណ្ឌា​លើកដំបូង ក្នុង​ទសវត្សរ៍​ឆ្នាំ១៩៦០ ហើយ​អស់​រយៈពេល​ច្រើន​ទសវត្សរ៍ បាន​ដើរតួនាទី​សំខាន់បំផុត​របស់​កង​កម្លាំង​ទ័ពអាកាស​របស់​ប្រទេស​នេះ​៕​